Omon Aziz: «Haykallarni ko‘chirishdan boshqa ishi yo‘qmi bularning?»

9 may kuni Shomahmudovlar haykali qayta ochildi. Toshkentlik taxlilchi Anvar Nazir fikriga ko‘ra, bu haykal sovet davrini qo‘msagan o‘zbekistonliklar uchun ramzga aylangan.

Haykaltarosh va kandakor rassom Omon Aziz O‘zbekistonda haykalning ko‘chirilib uchinchi bor qayta ochilishini mantiqsizlik deya atadi.

«Ularning boshqa ishi yo‘qmi, degan savol tug‘iladi» dedi Eltuz muxbiriga bergan intervyusida 75 yoshli haykaltarosh Omon Aziz.
Shomaxmudovlar kompozitsiyasi 1982 yil yili Dmitriy Ryabichev tomonidan yaratilgandi.

25 yildan buyon Amerikada yashayotgan ijodkor Omon Aziz sovet davrida butun Toshkent haykaltaroshligi Shapiro bilan Ryabichev ixtiyoriga o‘tib qolganini aytdi.

Tag‘in uning so‘zlariga ko‘ra, 80 yillarda urush mavzuidagi Abdumo‘min Boymatov, Damir Ro‘ziboev kabi o‘zbek haykaltaroshlarining asarlari tanlovga qo‘yilgan.

«Abdumo‘min akaning «Sen yetim emassan» kompozitsiyasi o‘sha Ryabichevnikidan ko‘ra yaxshiroq edi. Huddi shoshmaqom musiqasini eslatardi, betakror edi», deya eslaydi Omon Aziz o‘sha tanlovga qo‘yilgan asarni.

Ryabichevning beqiyos san'atkor ekanini e'tirof etarkan, san'atkor sifatida haykalning ayrim nuqsonlarini sanaydi.

«Masalan, men erkakning nima uchun tikka turganini bilmayman. Lekin bolalar yaxshi topilgan», deydi Omon Aziz.

Shunga qaramay u haykallarni ko‘chirmaslik kerak degan fikrda.

2008 yili Shomahmudovlarga ornatilgan haykal «Xalqlar do‘stligi» maydonidan ko‘chirilgan. Karimov davrida esa bu maydon «Istiqlol» deya o‘zgartirilgandi.

Eltuz.com