АҚШ полицияси ўзбек педофилини ушлади

Питтсбургда истиқомат қилиб келган ўзбекистонлик Мақсуджон Қосимов ижтимоий тармоқда ФБР ва Кранбери полициячилари тарафидан очилган сохта 15 ёшли қиз саҳифасига кириб, унга шаҳвоний видеолар йўллаган ва яқинлик таклиф қилган. Шундан сўнг (гўёки) рози бўлган қиз билан унинг уйида учрашиш ниятида бир неча километр нарида жойлашган Кранбери шаҳрига кетаётганида қўлга олинган. 

Ўзбекистон ватандоши шу тариқа педофил жиноятчиларни аниқлаш ва ҳибсга олиш учун атай уюштирилган “тадбир” тўрига тушган.

15 ёшли қиз билан яқинлик орзуси уни қамоққа олиб борган… Мақсуджон мақсадига етди. Маҳаллий матбуотга кўра, бу 23 яшар йигит шаҳвоний суратларни ёш қизалоқларга ҳам жўнатгани текширилмоқда.

Айрим ватандошларнинг АҚШда ўзини жуда ҳам хунук тутаётгани ҳақида гапирганимизда, албатта, бир қатор эътирозлар бўлди. Кимдир бизни янги келаётган ватандошларга нисбатан адоватда, кимдир мусулмончиликка тўғри келмас ҳаракатларда айблади.

Мана сизга оқибат. Ҳеч шубҳасиз, бу йигитнинг келажаги (Америкадагиси) жуда аянчли. Унга нисбатан олға сурилаётган айблов АҚШда жуда ҳам қатъий чоралар кўрилишини назарда тутади.

Йигитни маълум муддат қамоқ жазоси ва ундан кейин шубҳасиз депортация кутяпти. Зеро уни АҚШ жамияти учун ўта хавфли деб топишлари аниқ.