Наманганлик 42 яшар эркак ақидапарастликда айбланиб уч йилга қамалди

Жорий йилнинг 25 октябр куни, жиноят ишлари бўйича Наманган туман суди, 42 яшар МБни интернетда “диний ақидапарастлик ғояларини тарғиб қилиш, Ўзбекистон Республикасига олиб кириш ва тарқатиш”да айблаб 3 йил озодликдан маҳрум қилди.

Элтузда нусхаси бўлган жазо ҳукмида билдирилишича, МБ «Redmi note 8 pro» русумли телефони орқали Однаклассники сайтида профил очиб, шу аккаунти орқали интернетдаги “турли ғоявий зарарли материалларни” томоша қилган, уларга “класс” босган ва тарқатган.

Жиноят иши ҳужжатларига кўра, Однаклассники сайтига қўйилган “Устоз Абдуллоҳ домлага Устоз Абу Салоҳ домладан рад”, Рафиқ Камоловнинг “8-март байрами ҳақида”, “бенамозлик ҳақида” каби  постлари шулар жумласидандир.

Элтуз ўрганган тергов материалларида, жумладан, айбланувчининг Однаклассники сайтидаги “12 та гуруҳга аъзо бўлгани, 99 та фото, тўртта қайдлар жойлагани, шунингдек профилининг “Lenta” қисмида турли хил видео, аудио, фотоларга муносабат билдиргани қайд этилган.

2023 йилнинг 2 июнида МБ Наманган шаҳар ИИБ тезкор ходимлари томонидан бир нечта холислар ва гувоҳлар иштирокида қўлга олинди.   

Дастлабки тергов материаллари, экспертлар ҳулосасига таяниб суд уни ЖКнинг 244-моддаси 3 қисмининг “г” бандидаги жиноятни қилишда айбдор деб топди.

Мавсумий ишчи бўлган МБ муқаддам судланмагани, чин кўнгилдан пушаймонлиги, оилада ёлғиз боқувчи экани, қарамоғида тўрт нафар вояга етмаган фарзандлари борлиги инобатга олиниб жазо енгиллаштирилди ва озодликни чеклаш жазосини яшаш жойида ўташи тайинланди.

Eltuz.com