Шведлар алданган ўзбекларни қутқармоқда

Стокгольм шаҳрида Швециянинг “Solidariska byggare” (Қурувчилар бирдамлиги) касаба уюшмаси ўзбек меҳнат муҳожирлари учун доимий учрашувлар ташкил қилмоқда. Бу учрашувлардан мақсад уларга, меҳнат ҳуқуқлари билан боғлиқ фирибгарлик, қонунларни билмаслик ва бунинг оқибатида ишлаб топган пулларини тўлиқ ололмасликлари юзасидан яқиндан ёрдам беришдир дейди уюшма рахбари Пелле Сунвиссон Элтуз нашрига берган суҳбатида.

“Бугунги кунда Швециядаги аксарият ўзбек меҳнат мигрантларининг катта муаммолари бор. Бу биринчи навбатда уларнинг иш ҳақларини ундира олмасликларида кўзга ташланади. Улар кўпинча қонунни, тилни, ўз меҳнат ҳуқуқларини билмаганликлари боис фирибгарлик қурбони бўлишади. Айримлари эса нолегал фаолият кўрсатишади ва миграция идоралари билан ҳам муаммолари бор.»

Бироқ Сунвинсоннинг сўзларига кўра, Швецияда касаба уюшмалари фаолияти ҳукумат ва миграция идораларидан мустақилдир. Шу боис улар швед ватандошлари билан бир хил тарзда, Швецияда яшаш ва меҳнат қилиш иқомати миграция ҳужжатлари бўлмаган ишчиларга ҳам ёрдам кўрсатишади.

Ўтган якшанба куни касаба уюшмасининг иккита залига Швецияда аксариятни ташкил қилаётган ўзбек тилида ва рус тилида гаплашувчи икки гуруҳ очиқ учрашувга таклиф қилинди ва уларга ўзаро мулоқот асносида ҳуқуқлари, муаммоларини ҳал қилиш йўллари тушунтирилди.

Элтуз тайёрлаган видеолавҳа билан танишинг.