Камбағалликни қисқартириш ва бандлик вазирлигида миллиардлар қаерга кетди?

Камбағалликни Қисқартириш ва Бандлик вазирлиги фаолияти юзасидан жамоатчиликда бир қатор савол ва ташвишлар пайдо бўлмоқда. Айрим манбаларда таъкидланишича, вазирликнинг меҳнат инспекцияси билан боғлиқ ишларда камчиликлар мавжуд бўлгани учун Халқаро Меҳнат Ташкилотининг 81 ва 129 конвенцияларига оид талаблар тўлиқ бажарилмагани қайд этилган. Шу боис Ўзбекистонга нисбатан халқаро экспертлар томонидан танқидий баҳолар берилгани айтилади.

Жамоатчилик фикрида асосий саволлардан бири 2025 йил давомида вазирлик номидан амалга оширилган бир неча хизмат сафарига таalluқли. Россия, Женева, Жанубий Корея, Камбоджа, Турин, Австрия ва бошқа давлатларга уюштирилган ташрифларга, маълумотларга кўра, Меҳнат инспекцияси бошлиғининг ўринбосари Нилуфар Аманиязова раҳбарлик қилган. Шу муносабат билан вазирликда нега доим бир шахс бошчилик қилиши, бунинг сабаблари ва зарурияти ҳақида жамоатчилик ўртасида турли фикрлар пайдо бўлмоқда.

Айрим ҳисоб-китобларда ҳар бир сафар давлат бюджетига тахминан 300–400 миллион сўм атрофида тушгани билдирилган. Умумий ҳисобда бир неча сафар харажатлари икки миллиард сўмдан юқори бўлиши мумкинлиги ҳақида ҳам фикрлар айтилмоқда. Аммо бу сафарлар қай даражада самара берди ва уларнинг натижалари жамоатчиликка очиқ тақдим этилдими?

Вазирликдаги кўплаб ходимларнинг фикрича, агар ушбу маблағлар самарали йўналтирилганида, мамлакатда ижтимоий ҳимояга муҳтож оилаларга ёрдам кўрсатиш, реабилитация марказлари қуриш, ногиронлиги бўлган шахсларга зарур анжомлар харид қилиш ёки камбағалликни қисқартириш бўйича қўшимча дастурларни қўллаб-қувватлаш мумкин эди.

Вазирлик ходимлари талабига кўра, давлат органлари бундай масалалар бўйича очиқ ахборот тақдим этиши, сарфланган маблағларнинг мақсадга мувофиқлигини тушунтириши ва аҳолининг ишончини мустаҳкамлаши муҳим. 

Мутахассислар фикрича, давлат идоралари фаолиятида очиқлик ва жавобгарлик юқори бўлса, келгуси қарорлар самараси ҳам ошади.