Kambag‘allikni qisqartirish va bandlik vazirligida milliardlar qaerga ketdi?

Kambag‘allikni Qisqartirish va Bandlik vazirligi faoliyati yuzasidan jamoatchilikda bir qator savol va tashvishlar paydo bo‘lmoqda. Ayrim manbalarda ta'kidlanishicha, vazirlikning mehnat inspektsiyasi bilan bog‘liq ishlarda kamchiliklar mavjud bo‘lgani uchun Xalqaro Mehnat Tashkilotining 81 va 129 konventsiyalariga oid talablar to‘liq bajarilmagani qayd etilgan. Shu bois O‘zbekistonga nisbatan xalqaro ekspertlar tomonidan tanqidiy baholar berilgani aytiladi.

Jamoatchilik fikrida asosiy savollardan biri 2025 yil davomida vazirlik nomidan amalga oshirilgan bir necha xizmat safariga taalluqli. Rossiya, Jeneva, Janubiy Koreya, Kambodja, Turin, Avstriya va boshqa davlatlarga uyushtirilgan tashriflarga, ma'lumotlarga ko‘ra, Mehnat inspektsiyasi boshlig‘ining o‘rinbosari Nilufar Amaniyazova rahbarlik qilgan. Shu munosabat bilan vazirlikda nega doim bir shaxs boshchilik qilishi, buning sabablari va zaruriyati haqida jamoatchilik o‘rtasida turli fikrlar paydo bo‘lmoqda.

Ayrim hisob-kitoblarda har bir safar davlat byudjetiga taxminan 300–400 million so‘m atrofida tushgani bildirilgan. Umumiy hisobda bir necha safar xarajatlari ikki milliard so‘mdan yuqori bo‘lishi mumkinligi haqida ham fikrlar aytilmoqda. Ammo bu safarlar qay darajada samara berdi va ularning natijalari jamoatchilikka ochiq taqdim etildimi?

Vazirlikdagi ko‘plab xodimlarning fikricha, agar ushbu mablag‘lar samarali yo‘naltirilganida, mamlakatda ijtimoiy himoyaga muhtoj oilalarga yordam ko‘rsatish, reabilitatsiya markazlari qurish, nogironligi bo‘lgan shaxslarga zarur anjomlar xarid qilish yoki kambag‘allikni qisqartirish bo‘yicha qo‘shimcha dasturlarni qo‘llab-quvvatlash mumkin edi.

Vazirlik xodimlari talabiga ko‘ra, davlat organlari bunday masalalar bo‘yicha ochiq axborot taqdim etishi, sarflangan mablag‘larning maqsadga muvofiqligini tushuntirishi va aholining ishonchini mustahkamlashi muhim. 

Mutaxassislar fikricha, davlat idoralari faoliyatida ochiqlik va javobgarlik yuqori bo‘lsa, kelgusi qarorlar samarasi ham oshadi.