САРИОСИЁ ИЖТИМОИЙ ЁРДАМ МАРКАЗИДАГИ ОРГИЯЛАРДАН СЎНГ БИР НЕЧТА ХОДИМ ИШДАН ОЛИНДИ

Сурхондарё вилояти Сариосиё туманидаги ижтимоий ёрдам марказида ходимларнинг ногиронлар пулини ўзлаштиргани ва иш жойида секс оргиялар ташкил қилгани фош этилганидан сўнг Президент ҳузуридаги Ижтимоий ҳимоя миллий агентлиги бу муассасада хизмат текшируви ўтказди.

9 июнь куни ўтказилган текширув натижасига кўра, тамаъгарлик ва маиший бузуқлик содир этган тўрт нафар хотин ишдан бўшатилди. Шу билан бирга марказ раҳбарининг ўринбосари ҳам лавозимидан озод этилди. Масъул вазифада бўлиб, ҳолатларга кўз юмган бир неча мулозимга ҳайфсан ва огоҳлантириш берилди.

Расмий маълумотда таъкидланишича, марказ ходимларига ижтимоий ёрдам муассасалари халқ дардини тинглайдиган ва муҳтожларга ёрдам қўлини чўзадиган жой экани қатъий равишда тушунтирилган.

Эслатиб ўтамиз, Элтузда чоп этилган мақолада мазкур муассасада фуқароларнинг ижтимоий нафақалари талон-торож қилингани ва иш жойида жинсий тартибсизликка йўл қўйилгани ҳақида мақола эълон қилинган эди.