ШУҲРАТ ҒАНИЕВ: «ФЕРМЕРЛАРНИНГ ҚУЛОҒИНИ КЕС»

17 июл куни, соат 13:00 да Президентнинг аграр ривожланиш масалалари бўйича маслаҳатчиси Шуҳрат Ғаниев онлайн мажлис ўтказди. 

Мажлис мавзуси – Қишлоқ хўжалиги масалалари. «Фермерлар ишламайди, техникалар кун бўйи бекор турибди. Ҳокимлар, агар туман 45 центнер пахта планини бажармаса, ҳамманг шарманда бўласанлар» – дейди Ғаниев.

Ҳокимлар мук тушиб конспект қилиш билан банд: эртага, йўқ, бугуноқ фермерларни тузлаш керак!

«Сув дала бошига ташлаб қўйилган. Зовурларга оқиб ётибди. Сув дала охиригача етиб бормаяпти. Фарғона, Наманган, Қашқадарё, Андижон – агар ҳозир суткасига 24 соат далада ишламасаларинг, ҳамманг шарманда бўлиб ўлиб кетасанлар..» – хуноб бўлади Президент маслаҳатчиси Шуҳрат Ғаниев. 

Ҳоким бовалар эса «ёзиб олдик, бажарамиз» дейишдан нарига ўтмайди. 

«Ёзиб олганингни нима қиламан! Бор, далага туш. Фермерларни терга, қулоғини кесиб ишлат. Э, виждонсизлар! Ғўза парвариши ўлган, далалар бўм-бўш. Эртага план тўлмаса, сенларам ўласан. Ҳозир далага чиқиб фермерни ишлат. Овозингни чиқармайдиган қилиб бари билан битталаб гаплашиб ол. Қайтараман, бир ойдан кейин баринг ўласан, шунчаки, ўлиб кетасанлар» – Ғаниевнинг бу кўрсатмалари ҳам муқоваси гербли блокнотга ёзиб олинди. 

Бу сафар ноқулай об-ҳаво деган баҳона ҳам ўтмаскан. Ишқилиб пахта план тўлсин. Йўқса, қимматли ҳоким боваларимиздан ёппасига айрилиб қоламиз.