Паркентда янги уйлар муаммолари норозиликка сабаб бўлди

Тошкент вилояти, Паркент туманидаги “Паркентсой” турар жой мажмуасида хонадон харид қилган фуқаролар уйлар сифати ва шароитидан норозилик билдирмоқда. Улар бу ҳақда Элтуз таҳририятига мурожаат қилиб, муаммоларига жамоатчилик эътиборини қаратишни сўрамоқда.

Сотув вақтида фуқароларга уйлар 2025 йил сентябрь ойида фойдаланишга топширилиши айтилган. Аммо ноябрь ойи кириб келганига қарамасдан, Халқ банки орқали берилиши керак бўлган уйлар ҳали ҳам тайёр эмас.

Президент ташрифи арафасида шошилиб тайёрланган ва расман фойдаланишга топширилган айрим хонадонларда эса муҳим коммунал муаммолар мавжуд. Қатор уйларда умуман сув йўқ. Кун давомида свет ўчиб туради. Иситиш тизими ҳали ҳам ишга тушмаган. Ёмғир вақтида бешинчи қаватдаги хонадонлар томидан сув томчилайди. Уйларнинг ички қисмидаги таъмир ишлари тўлиқ якунланмаган, баъзи жойлари қулаб тушмоқда.

Фуқаролар томонидан туман ҳокимлигига бир неча бор мурожаат қилинган. Бироқ ҳар сафар «эртага камчиликлар бартараф қилинади», «кейинги ҳафта топширамиз» деган сўзлар такрорланишда давом этмоқда.

Мурожаатда айтилишича, фуқаролар топширилмаган уйларни ҳам, муаммолар билан берилган уйларни ҳам эндигина эмас, илк кунлариданоқ қийинчилик билан қабул қилиб олган. Уларга кўра, бу каби лойиҳаларда масъулият ва сифат назорати биринчи ўринда бўлиши керак.