Parkentda yangi uylar muammolari norozilikka sabab bo‘ldi

Toshkent viloyati, Parkent tumanidagi “Parkentsoy” turar joy majmuasida xonadon xarid qilgan fuqarolar uylar sifati va sharoitidan norozilik bildirmoqda. Ular bu haqda Eltuz tahririyatiga murojaat qilib, muammolariga jamoatchilik e'tiborini qaratishni so‘ramoqda.

Sotuv vaqtida fuqarolarga uylar 2025 yil sentyabr oyida foydalanishga topshirilishi aytilgan. Ammo noyabr oyi kirib kelganiga qaramasdan, Xalq banki orqali berilishi kerak bo‘lgan uylar hali ham tayyor emas.

Prezident tashrifi arafasida shoshilib tayyorlangan va rasman foydalanishga topshirilgan ayrim xonadonlarda esa muhim kommunal muammolar mavjud. Qator uylarda umuman suv yo‘q. Kun davomida svet o‘chib turadi. Isitish tizimi hali ham ishga tushmagan. Yomg‘ir vaqtida beshinchi qavatdagi xonadonlar tomidan suv tomchilaydi. Uylarning ichki qismidagi ta'mir ishlari to‘liq yakunlanmagan, ba'zi joylari qulab tushmoqda.

Fuqarolar tomonidan tuman hokimligiga bir necha bor murojaat qilingan. Biroq har safar «ertaga kamchiliklar bartaraf qilinadi», «keyingi hafta topshiramiz» degan so‘zlar takrorlanishda davom etmoqda.

Murojaatda aytilishicha, fuqarolar topshirilmagan uylarni ham, muammolar bilan berilgan uylarni ham endigina emas, ilk kunlaridanoq qiyinchilik bilan qabul qilib olgan. Ularga ko‘ra, bu kabi loyihalarda mas'uliyat va sifat nazorati birinchi o‘rinda bo‘lishi kerak.