18 январь – Германия империяси яратилди

1871 йил 18 январь — нафақат Германия, балки бутун Европа тарихини тубдан ўзгартириб юборган воқеа содир бўлган кундир. Шу куни Европа харитасида янги бир қудратли давлат — Германия империяси (Иккинчи Рейх) пайдо бўлди.

Энг қизиғи шундаки, Германия империяси айни давлатнинг ўзида эмас, балки мағлуб этилган Франциянинг юрагида — Париж яқинидаги Версаль саройининг «Ойнаванд зали»да эълон қилинган. Бу французлар учун жуда катта таҳқир эди. Пруссия қироли Вильгельм I айнан шу ерда императорлик тожини қабул қилган.

Салтанатнинг бош меъмори

Германиянинг бирлашиши тасодиф эмас, балки «Темир канцлер» деб ном олган Отто фон Бисмаркнинг узоқ йиллик сиёсий ва ҳарбий ўйинлари натижаси эди. У Германияни «темир ва қон» билан бирлаштириш кераклигини айтган ва бунга эришган.

Бисмарк бирлашиш йўлида кетма-кет учта муваффақиятли уруш олиб борди. 1864 йилда Данияни, 1866 йилда Австрияни ва ниҳоят 1870–1871 Францияни бўйсундирди.

Франциянинг мағлубияти немис давлатларининг Пруссия атрофида жипслашишига сўнгги туртки бўлди.

Дунё янги куч билан юзлашди

1871 йилгача немис ерлари ўнлаб майда қиролликлар, герцогликлар ва эркин шаҳарлардан иборат эди. 18 январдаги эълон билан Вильгельм I — Германия императори (Кайзер) бўлди.

Пруссия — империянинг етакчи кучига айланди. Бовария, Саксония ва Вюртемберг каби қиролликлар ўз ички бошқарувини сақлаб қолган ҳолда ягона империя таркибига кирди.

Германия империясининг ташкил топиши дунёдаги кучлар мувозанатини бутунлай бузди. Германия тез фурсатда Европадаги энг йирик саноат марказига айланди.

Дунёдаги энг кучли қуруқликдаги армия ва замонавий флот шаклланди. 

Версалдаги маросим ва Эльзас-Лотарингия ерларининг тортиб олиниши Францияда қасос олиш ҳиссини уйғотди. Бу адоват кейинчалик Биринчи жаҳон урушининг асосий сабабларидан бири бўлди.