ҚАРШИ ДАВЛАТ ТЕХНИКА УНИВЕРСИТЕТИ ҚУЛОҒИГАЧА ҚАРЗГА БОТДИ

Қарши Давлат техника университети 2025 йил 8-12-апрел саналарида «Сomfort makon» МЧЖ билан шартнома тузиб, товарларни тўлиқ қабул қилиб олди. Лекин университет «оларда кирар жоним, берарда чиқар жоним» қабилида қарзини тўлашдан бош тортмоқда.

Ҳарид Давлат хизматлари электрон тизими орқали расмийлаштирилган – 150 метр квадрат жалюзи пардалари ва 18 дона юқори конфигурацияли суперкомпьютерлар. Ушбу товарлар 12 апрел куни университетга етказиб берилган.

Бироқ 14-апрел куни университет раҳбарияти таркибида ўзгариш бўлди. Университет шу баҳона билан тўловни пайсалга солиб келмоқда. 

19-майда тадбиркор С.Хўжамуродов университет билан яна бир бор шартнома тузиб маҳсулот етказиб берди. Бироқ бу товарнинг пули ҳам ҳали тўланмаган. Университет «Comfort makon» ва «Tovar tamir taminot» МЧЖдан умумий қийматда 8 миллиард сўмлик товар сотиб олган. Икки компания бир тадбиркорга тегишли. Тадбиркор С.Хўжамуродов университет раҳбариятига бир неча марта мурожаат қилган. 

«Сен товарни эски раҳбариятга бергансан. Ўша эски раҳбарият пулингни тўлаб берсин» – Қарши Давлат техника университети  тадбиркорга шундай жавобни раво кўрган.

Университет раҳбарияти етказиб берилган товарларни қайтариш ҳақида ҳам ўйламаяпти. Қарз тўланмаган, лекин  компьютерлардан фаол фойдаланишмоқда. 

«Молия-иқтисод ишлари бўйича проректор Аловиддин Зайниддиновга, бош ҳисобчи Ғанишер Набиевга мурожаат қилдим. Лекин улар назаримда қандайдир моддий манфаат олишдан умидвор. Ҳужжатлар, счёт фактураларни қайтариб юборишяпти. Клавиатурада тўғри келган ҳарфларни босиб рад этиб юборишяпти» – дейди тадбиркор.

На 8 миллиард қарзини тўламаса, на товарни қайтармаса – Қарши давлат техника университети раҳбариятининг қароқчи тўдадан нима фарқи бор?