QARShI DAVLAT TYeXNIKA UNIVYeRSITYeTI QULOG‘IGAChA QARZGA BOTDI

Qarshi Davlat texnika universiteti 2025 yil 8-12-aprel sanalarida «Somfort makon» MChJ bilan shartnoma tuzib, tovarlarni to‘liq qabul qilib oldi. Lekin universitet «olarda kirar jonim, berarda chiqar jonim» qabilida qarzini to‘lashdan bosh tortmoqda.

Harid Davlat xizmatlari elektron tizimi orqali rasmiylashtirilgan – 150 metr kvadrat jalyuzi pardalari va 18 dona yuqori konfiguratsiyali superkompyuterlar. Ushbu tovarlar 12 aprel kuni universitetga yetkazib berilgan.

Biroq 14-aprel kuni universitet rahbariyati tarkibida o‘zgarish bo‘ldi. Universitet shu bahona bilan to‘lovni paysalga solib kelmoqda. 

19-mayda tadbirkor S.Xo‘jamurodov universitet bilan yana bir bor shartnoma tuzib mahsulot yetkazib berdi. Biroq bu tovarning puli ham hali to‘lanmagan. Universitet «Comfort makon» va «Tovar tamir taminot» MChJdan umumiy qiymatda 8 milliard so‘mlik tovar sotib olgan. Ikki kompaniya bir tadbirkorga tegishli. Tadbirkor S.Xo‘jamurodov universitet rahbariyatiga bir necha marta murojaat qilgan. 

«Sen tovarni eski rahbariyatga bergansan. O‘sha eski rahbariyat pulingni to‘lab bersin» – Qarshi Davlat texnika universiteti  tadbirkorga shunday javobni ravo ko‘rgan.

Universitet rahbariyati yetkazib berilgan tovarlarni qaytarish haqida ham o‘ylamayapti. Qarz to‘lanmagan, lekin  kompyuterlardan faol foydalanishmoqda. 

«Moliya-iqtisod ishlari bo‘yicha prorektor Aloviddin Zayniddinovga, bosh hisobchi G‘anisher Nabievga murojaat qildim. Lekin ular nazarimda qandaydir moddiy manfaat olishdan umidvor. Hujjatlar, schyot fakturalarni qaytarib yuborishyapti. Klaviaturada to‘g‘ri kelgan harflarni bosib rad etib yuborishyapti» – deydi tadbirkor.

Na 8 milliard qarzini to‘lamasa, na tovarni qaytarmasa – Qarshi davlat texnika universiteti rahbariyatining qaroqchi to‘dadan nima farqi bor?