Умида Ниёзова: Карра сонлар ўрни алмашган билан натижа ўзгармайди

Сўнгги вақтларда деярли ҳар куни ҳоким ёки ҳоким ўринбосарлари пора олгани сабаб қўлга олингани ҳақида хабарлар чиқмоқда. Албатта, порахўрларни ушланиб, жавобгарликка тортаётилаётгани яхши. Лекин шундан кейин коррупция камайиб ёки буткул йўқолиб кетадими? 

Катта эҳтимол билан йўқ. Чунки уларнинг ўрнига келган янги одамлар ҳам худди шундай ваколат ва имкониятларга эга бўлиб, пора олишни давом эттиришлари мумкин. Фақат янгича схемалар ўйлаб топиб, бундан буён жуда эҳтиёткорлик билан ҳаракатланишади.

Чунки коррупция — бу кўпроқ қўрқув эмас, балки васваса аломати. Яъни, тез ва меҳнатсиз катта суммага эга бўлиш имконияти бўлса — бундай васвасага дош бериш қийин. 

Шунинг учун, энг аввало ҳар жабҳа маъмуриятида инсон омилини камайтириш керак, бошқарув аппаратининг коррупция учун имкониятлари минимал даражада бўлиши лозим.

Энг асосийси, коррупцияга қарши курашиш учун ҳақиқий сўз эркинлиги зарур. Аммо ҳақиқий сўз эркинлиги ўзбек жамиятининг устувор қадриятларига таҳдид сифатида кўрилади. Сўз эркини талаб етишга, ҳазм қилишга жамият тайёрми?