Gazetalar prezidentning «puf»i ortidan tirilyaptimi?

Prezident «puf» degandan keyin tadbirkorlar va ishbilarmonlar gazetasi bo‘lmish «XXI asr»ga (19.01) jon kirayotgandek bo‘ldi.

Ha yo‘q, be yo‘q, necha yillardan beri tilga olmagan muammosi, naqd pul va plastik kartada savdo qilishdagi farqlar haqida maqola e'lon qilib qoldi.

Eng qizig‘i, bu muammoni «…hamma bilgan haqiqat haqidagi ayrim kuzatuvlar» sifatida taqdim etgan.

Oldindan aytib qo‘yaylik, hamma bilgan bu muammo gazeta sahifalarida nega shu vaqtgacha yoritilmaganiga javobni izlab ovvora bo‘lmang!

Xullas, maqolada plastik kartochkadagi pulingiz naqddan ko‘ra qadrsizroq ekani tilga olinadi.

Jumladan, «Toshkent» vokzaliga borib, «Afrosiyob» poezdiga naqdga xohlagancha, lekin plastikka ikki-uchtadan ko‘p chipta xarid qila olmasligingiz, hatto farzandingizning o‘qish uchun shartnoma pulini to‘lashingizda ham shu masalada muammo kelib chiqishi mumkinligi bildiriladi.

Bozorlarda ham muammo mavjudligi, sotuvchilarning bunga qanday bahona keltirishi aytib o‘tilgan.

Eng e'tiborli jihati, gazeta muammoning ildizini hukumatning moliyaviy siyosatida emas, aholining o‘z huquqini anglashida (to‘g‘rirog‘i, anglamasligida) ko‘radi.

«…bu kabi og‘riqli masalalarga qonuniy yechim topishning birdan bir yo‘li ham, avvalo, o‘zimizning haq-huquqimizni anglash va boshqalarni ham shunday to‘g‘ri, halol yo‘lga undashdir», deb yozadi gazeta.

Hurmatli gazetchilar! Xalq siz o‘ylagandek o‘z huquqini bilmaydigan olomon emas. Ayniqsa, pul masalasida. Odamlar hisob raqamidagi yoki plastik kartadagi pulni naqd qilish uchun necha foiz muttahamlik puli (zamonaviy tilda vositachilik deyiladi) olinishini yaxshi biladi.

Shuning uchun ularni huquqini bilishga emas, balki hukumatni adolatli moliyaviy siyosat yuritishga chorlash to‘g‘riroq bo‘lmasmikin!?

Eltuz.com