O‘zLiDePchilar vaqt kutib turmasligini bilib qoldi

«XXI asr» gazetasi (26.01) O‘zbekiston liberal demokratik partiyasi siyosiy kengashi ijroqo‘mi va parlamentdagi fraktsiyasining kengaytirilgan qo‘shma yig‘ilishi haqida maqola e'lon qildi.

Partiya yetakchisi majlisni «muhtaram prezident tilga olgan barcha muammolar ortida hayotiy haqiqat yotgani» to‘g‘risidagi e'tirof bilan boshlagan.

Shundan so‘ng yangi prezidentning yil yakunlariga bag‘ishlangan yig‘ilishdagi ma'ruzasi «xalqimiz uchun dasturilamal» ekanini bildirib, uni «puxta o‘rganib chiqishni partiya a'zolari o‘rtasida tizimli tashkil etish lozim»ligini aytgan.

O‘zLiDePning «Diplom bilan biznes»ga nomli loyihasi bor. Bu loyiha doirasida kollej bitiruvchilariga tijorat banklari tomonidan kredit ajratiladi. Shu paytgacha partiya mazkur loyiha ishtirok etgan falonta bitiruvchiga falon million so‘m kredit berilgani to‘g‘risida og‘iz ko‘pirtirib kelardi.

Endi ma'lum bo‘lyaptiki, gazetaning yozishicha, partiya berilgan deb ayyuhannos solingan bu kreditlar berilgan yoki berilmaganidan ham bexabar ekan.

«Umuman olganda, ularga kredit ajratilyaptimi, degan haqli savollar hali-hunuz ochiqligicha qolmoqda», deb yozdi gazeta.

«Vaqt endi kutib turmaydi, barchamizdan qat'iyatlilik, tashabbuskorlik, fidoyilik talab etilyapti», deya e'lon qilindi partiya majlisida.

Qiziq, shuncha vaqtgacha partiya vaqt kutib turadi, deb o‘ylaganmikin? Yoki marhum prezidentning uzoqqa cho‘zilgan hukmronligi sabab ularga vaqt to‘xtab qolgandek tuyulganmikin?
Partiya majlisida aytilgan gaplar qog‘ozda qolib ketishi hozirdanoq aniq ekaniga ishora qiluvchi jihatlar bor maqolada.

Jumladan, partiya yetakchisi aholining muammolarini va ularni yechish yo‘llarini o‘rganish o‘rniga prezident nutqining o‘zini o‘rganishni tizimli tashkil etishga urg‘u berayotgani ana shunday xulosaga yetaklovchi ishoralardan biridir.

Bahodir Sharif
O‘zbekistonlik gazetxon tahallusi
Eltuz.com