Abduraxim Po‘latov: Erdo‘g‘on g‘alaba qilsa Turkiya parchalanadi

Muholifatdagi “Birlik” partiyasi lideri, hozir AQShda yashaëtgan Abdurahim Po‘latov Turkiya vatandoshlariga murojaat qilib, yakshanba kuni Turkiyada prezident vakolatini uzaytirish masalasida o‘tkazilgan referendumda Konstitutsiyadagi o‘zgartirishlarga qarshi ovoz berishga chaqirdi.

O‘zining feysbukdagi sahifasida 72 yashar muxolifatchi Po‘latov 16 aprel kuni Turkiyada bo‘laëtgan referendumni “davlatni islomiylashtirishga yo‘l ochish maqsadidagi xatarli tadbir” deya atadi.

«Referendumda Rajab Erdo‘g‘on tarafdorlari, to‘g‘rirog‘i, islomchilar g‘alaba qozonsa, Turkiya islomlashish yo‘lidan ketishni jadallashtirib, tezda to‘la islomiy davlatga aylanishi, bu narsa butun dunyoni ostin-ustin qilib yuborishi muqarrar, natijada Turkiya parchalanib ketishi aniq», deya ta'kidlaydi “Birlik” Partiyasi lideri Abdurahim Po‘latov.

Turkiyadagi referedumda o‘zgartirishlarga “Ha” deydiganlar g‘olib chiqsa, hammaga yomon bo‘lishi haqida ogohlantirgan Po‘latov referendum natijalari qanday bo‘lishidan qat'iy nazar Rajab Toyyib Erdo‘g‘on Turkiya istiqboli uchun xatarli shaxs bo‘lib qolaverishiga e'tibor qaratdi:

«Shuni ham tushunamanki, bugun referendumda islomchilar yutqazsalar ham, Rajab Erdo‘g‘on o‘z niyatidan qaytmaydi. U hozir Turkiyada o‘z diktatorligini o‘rnatib bo‘ldi, demak, mavjud Konstitutsiyaga tupurib bo‘lsa ham, Turkiyani islomiy davlat deb e'lon qilish yo‘lida ish olib boraveradi. Mening maqsadim, birinchi navbatda, turkiy davlatlarning raxbarlari, qolaversa, butun G‘arb Rajab Erdo‘g‘onning rejalariga ochiqdan-ochiq qarshi chiqishi, kerak bo‘lsa, uni bu rejealardan voz kechishga zo‘rlash yo‘liga o‘tishlariga erishishdir.

Aks holda, Turkiya parchalanib ketadi, Turk Dunyosi tushunchasi o‘ladi, Markaziy Osiyo davlatlari Xitoyning vassallariga aylanadilar», deya ta'kidlaydi o‘z murojaatida Abdurahim Po‘latov.

Turkiyada Prezidentlik vakolatlarini kengaytirish borasida xalq referendumi bo‘lib o‘tmoqda.

Ovoz beruvchilar Rajab Toyib Erdo‘g‘ondan boshlab kelajak prezidentlarga yangi vakolat berish-bermaslikni hal qilishadi.

Erdo‘g‘on boshchiligidagi Adolat va Taraqqiyot partiyasi Turkiyaning parlamentar boshqaruvini Prezident boshqaruviga o‘zgartirishni istashadi.

Referendumda «Ha» deb javob berish Erdo‘g‘onning 2029 yilgacha hokimiyatda qolishiga sharoit yaratishi ham mumkin.

Rasm muallifi taniqli turk rassomi Ergin Asëli
Eltuz.com