«Paxtaga chiqmaganga gaz ballon yo‘q!»

Andijon shahrida, mahalla faollari gaz ballon berish va'dasi bilan odamlarni paxta terimiga jalb qilishmoqda.

«Eltuz» muxbiriga ko‘ra, Andijon shahridagi Gulchehra ismli «Erkin» mahalla faollari yig‘ini kotibasi «Paxta terimiga chiqmagan yoki mardikor terimchi yollamagan fuqarolarga propan gaz ballon sotilmasligini bildirgan.

Andijon shahar markazida joylashgan «Pillakash» maxalla faollari yig‘ini faollari ham uyma uy yurib gaz ballon olishni istaganlarning ro‘yxatini yig‘moqda.

«Hayot qiyinlashib ketdi, ikki oydan beri gaz ballon olib kelishmayapti. Endi bo‘lsa paxtaga chiqmasalaring gaz berilmaydi deyishayapti» deydi gaz o‘choqqa o‘tin yoqayotgan andijonlik uy bekasi «Eltuz» muxbiri bilan suhbatda.

Uning «Eltuz» muxbiriga bildirishicha, bitta gaz ballon 13000 so‘m turadi, bu kunga bir mahal ovqat va choy qaynatgan taqdirda 15 kunga yetishi mumkin.

Boshqa bir suhbatdosh, MFY kotibidan ma'lumotnoma olish uchun borganida undan, paxta terimi uchun pul to‘lashni talab qilgani haqida bildirdi.

Shuningdek u mahallaning tabiiy gaz tarmog‘idan besh yil burun uzilgani, elektr tarmog‘ida ham, ba'zan 12 soatgacha davom etadigan uzilishlar borligini aytadi.

Bosh vazir Abdulla Aripovning 21 sentyabr kuni majburiy terimchilarni paxtadan qaytarish haqidagi ko‘rsatmasiga qaramay Andijonda talabalarni majburiy terimga jalb etish davom etmoqda.

Jumladan, «Eltuz» muxbirining o‘rganishicha, Andijon shahridagi Sport kolleji talabalari xamon paxta termoqda.

Eltuz.com