“O‘zbekenergo” Rossiya istagi bilan uchga bo‘lingani iddao qilindi

Prezident Mirziyoev 27 mart kuni imzolagan qarorga ko‘ra, “O‘zbekenergo” aktsiyadorlik jamiyati “Issiqlik elektr stantsiyalari” AJ, “O‘zbekiston milliy elektr tarmoqlari” AJ, “Mintaqaviy elektr tarmoqlari” AJga bo‘lindi.

Sohaning bo‘linishi kutilayotgani haqida ilgariroq Podrobno.uz nashriga intervyu bergan shirkat raisi o‘rinbosari Feruz Qurbonov 1 martga qadar mamlakat rahbariga «O‘zbekenergo»ni restrukturizatsiya qilish haqida taklifni olib chiqishlari, oy oxirida bu loyiha tasdiqlanishi shartligini bildirgan edi.

«Ya'ni har bir kompaniya alohida xo‘jalik sub'ekti bo‘ladi va qanday qaror chiqarishni o‘zlari har qilishadi», deya ta'kidlagan edi u.

Hukumat qaroriga ko‘ra, yangi tashkil etilgan tuzilmalar yuridik shaxs sifatida 50 foiz aktsiyaga egalik qilishadi. Bu yangi paket xarid qilinishi hisoblanmaydi. Chunki bu «O‘zbekenergo»ning qayta tashkil etilishi doirasida amalga oshadi, deya yozdi, jumladan, Farg‘ona.ru nashri.

Ayni paytda, mamlakat energetika tuzilmasining «arralanishi»da O‘zbekistonda atom elektr stantsiyasini qurishni rejalagan Rossiyaning aralashuvi borligi iddao qilinmoqda.

«Chubaysning izi?» (Chubaysov sled?) sarlavhali maqolada «Uzmetronom» nashri ushbu jarayonning maslahatchilaridan biri o‘tgan yil oxirida mamlakatga jimgina kelib ketgan RAO YeES sobiq rahbari Anatoliy Chubays bo‘lishi ehtimoli haqida yozdi.

2018 yilning 19 oktyabrida Rossiya prezidenti tashrifi doirasida O‘zbekistonda Rossiya ishtirokida AES qurilishiga ramziy start berilgan edi.

Eltuz.com