«Ozodlik» muxbiri O‘zbekistonga kiritilmadi

«Ozodlik» radiosining Moskvadagi muxbiri, Rossiya vatandoshi va taniqli tarixchi 45 yashar Umid Bobomatov O‘zbekistonga kiritilmadi. U 4 iyun kuni Moskvadan Toshkentga uchib kelgan edi. Bobomatov bu haqda o‘zining feysbukdagi sahifasida habar qildi.

«Eltuz» muxbiriga voqea yuzasidan intervyu bergan Bobomatov uni avvaliga Toshkent aeroportidagi o‘zbek chegarachilari to‘xtatgani va ortiga qaytarib yuborgani, keyin esa Rossiya FXX xodimlari Moskva aeroportida uch soatcha ushlab o‘tirganini aytdi.

Bobomatovning «Eltuz»ga bildirishicha, Toshkent aeroporti xavfsizlik xizmati xodimlari tarafidan to‘xtatilib, keyingi reys bilan Moskvaga uchib ketishga majburlangan. Bu borada izoh so‘ragan Bobomatovga Toshkent rasmiylari bir parcha qog‘oz berishgan.

Umid Bobomatov «Ozodlik»ka qarshi rasmiy Toshkent tarafidan boshlangan obro‘sizlantirish kampaniyasidan keyin O‘zbekistonga kiritilmagan ilk jurnalistdir.

Bundan oldin «Ozodlik» muxbiri Noa Taker O‘zbekistonga xizmat safari bilan borganida monelik qilinmagan edi.

O‘tgan yili 28 iyun kuni «Ozod Yevropa/Ozodlik» radiosi vitse-prezidenti va bosh muharriri Nenad Pejich Toshkentda O‘zbekiston hukumati rasmiylari, xususan, prezident matbuot xizmati rahbari Komil Allamjonov bilan uchrashgani mahalliy matbuot tarafidan ijobiy ëritilgan edi.

Bobomatovning o‘zi Karimov davrida ham, Mirziëev iqtidorga kelganidan keyin ham O‘zbekistonga bemalol safar qilib yurgan edi.

«Ozodlik» radiosi 2005 yil dekabrga qadar Toshkentda o‘z muxbirlik byurosiga ega bo‘lgan. Radio dunëning 28 tilida xabar va tahlillar tarqatadi.

Eltuz.com