Shvetsiyada terror uyushtirishda ayblangan o‘zbek oqlandi

Shved apellyatsiya sudi «Islomiy davlat» terror tashkilotining Shvetsiyadagi portlashlarini uyushtirishda ayblanib yetti yilga qamalgan 46 yashar Farhod Toshmuhammedov (Shvetsiyaga kelib olgan ismi David Idrisson)ni oqladi. Bu haqda 12 iyun kuni shved nashrlari xabar tarqatdi.

Sud Toshmuhammedovni qo‘yilgan ayblar isbotini topmagani uchun oqlagan va sud zalidan ozod qilgan.

Shvetsiyaning Solna tumani sudi terrorchilikni moliyalash va teraktlar tayyorlashda gumonlanib bir yil burun hibsga olingan Farhod Toshmuhammedovni joriy yilning may oyida 7 yil qamoq jazosiga hukm qilgan edi.

Toshmuhammedovning ayblanishiga uning yuzlab kilogramm portlovchi moddalar xarid qilgani va «Islomiy davlat» guruhi a'zosi Botir Yusupov bilan aloqada bo‘lganini asos qilib ko‘rsatilgan edi.

“Eltuz” nashri olgan tergov hujjatlariga ko‘ra, o‘shanda 6 nafar (5 nafari O‘zbekistondan bo‘lgan) sudlanuvchiga “Islomiy davlat” (IShID terror tashkiloti)ga pul jo‘natmalari tashkil qilish, terrorchilikni uyushtirish ayblovi ilgari surilgan.

Biroq shved sudining apellyatsiya qarori qolgan 5 nafar sudlanuvchiga taalluqli emas.

“Eltuz” nashri shved sudi 2018 yilning 31 may kuni terror hujumi tayyorlashda gumon qilingan tag‘in to‘rt nafar o‘zbekistonlikni hibsga olish haqida qaror chiqargani haqida yozgan edi.

Eltuz.com