5 aprel – O‘zbekistonda Davlat xavfsizlik xizmati kuni

Chor davrida oxranka, sovet davrida ChK, GPU, NKVD, KGB, mustaqillik davrida esa SNB asosan millat manfatiga zarar keltirdi va oydinlarni qirib, o‘zidan ëmon va mudhish nom qoldirdi.

Ammo davlat va millat bor ekan, uning manfaatlarini shovinizm, imperializm changalidan hamda ekstremist, dindor guruh va to‘dalardan himoya qilishga zarurat doimo bo‘ladi.

Britaniya bosh vaziri Benjamin Dizraeli 1868 yilda ëzganidek, davlatning doimiy do‘st ëki dushmanlari yo‘q, ammo davlatning doimiy manfaatlari bor.

Oradan 150 yil o‘tsa ham bu gap o‘z dolzarbligini yo‘qotmadi.

Afsus, bundan 150 yil oldin Turkiston xonlari bu gapni tushunadigan darajada ong va zakovatdan mosuvo edi.

Ko‘zbo‘yamachilik, johillik, dabdababozlik, nepotizm va korruptsiya ulardan bizgacha yetib kelgan kir meros.

Davlat va millat manfatlarini esa qurollangan armiya, tashqi va ichki razvedka, kontrazvedka hamda xavfsizlik idoralari himoya qiladi.

Bu aslida sharafli maslak. Vatan va millat manfaatini himoya qilishdan ko‘ra yaxshiroq xizmat yo‘q.

O‘zbekiston davlat xavfsizlik tizimi Turkiyaning MIT (Milliy istixborat tashkiloti) ëki Isroilning MOSSADi kabi kuchli va faqat millat manfaatini ko‘zlaydigan tuzuk bo‘lishini orzu qilaman.

5 aprel – O‘zbekistonda Davlat xavfsizlik xizmati kuni.

Bayramingiz muborak bo‘lsin! Kasal bo‘lmang!

Rassom Tuz