Xongulni maoshi kamlar so‘yib yedimi?

Surxondaryoda hayvonot bog‘i xodimlari kiyik go‘shtini Yangi yil dasturxoniga tortmoqchi bo‘lishgani borasidagi ayblovlarni Termiz shahri prokuraturasi o‘rganmoqda. 

Prokuratura “Eltuz” muxbiriga Termiz shahridagi markaziy hayvonot bog‘ida kiyiklar 2020 yil 27 dekabrda so‘yilish oqibatida o‘lganini ma'lum qildi. 

Hayvonot bog‘i direktori Shuhrat Shaydullaev “Eltuz” bilan suhbatda bu voqea yuz berganida mehnat ta'tilida bo‘lgani, ishni o‘rganish uchun shahar prokuraturasiga o‘zi tashabbus bilan chiqqanini bildirdi.

– Avval hayvonot bog‘imizda bunday voqea kuzatilmagan, – dedi Shuhrat Shaydullaev. – Aybdorlar jazosini oladi. Men xodimlarimni ayblamoqchi emasman. Ularning aytishicha, kiyiklar bosh qismidan jarohat yegan va o‘lgan. So‘ng ularni yirtqich hayvonlarga berish maqsadida so‘yishgan. 

Ijtimoiy tarmoqlarda tarqalgan iddaolarga ko‘ra, bloger va hayvonot bog‘i atrofida istiqomat qiluvchi aholidan bog‘ rahbariyati ortiqcha ovoza qilmaslikni va kelishishni so‘ragan.

Ammo hayvonot bog‘i hisobchisi Husan Hayitov bu iddaolarni rad etar ekan, hozir voqeani ekspertlar o‘rganayotgani va vaziyatga to‘liq baho berilishini ma'lum qildi.

Nobud bo‘lgan jonzotlar xongul kiyigi bo‘lib, O‘zbekistonda noyob hayvonlardan hisoblanadi. U “Qizil kitob”ga kiritilgan. Ko‘payishi qiyin, terisi mayin va ko‘zlari chiroyli bo‘lgani uchun ham boshqa kiyik turlariga nisbatan noyobdir. Tanasida oq dog‘lari bo‘ladi. 

Termiz shahridagi hayvonot bog‘ida 150 ga yaqin hayvon mavjud bo‘lib, ularning 30  tasi noyob sanaladi.

Noyabr oyida ijtimoiy tarmoqlarda Navoiy shahridagi hayvonot bog‘ining ham noyob hayvonlari o‘lgani haqida xabar tarqalgan endi. Mutasaddilar bu voqea qarovsizlik natijasida ro‘y bergani, maosh kamligi sabab ishchilarning aksariyati ishdan bo‘shab ketgani bilan izohlagan edi.