Gulnora Karimova egalik qilgan «Sijjak» dam olish maskani kasaba uyushmasi federatsiyasiga o‘tdi

Muqaddam Gulnora Karimova egalik qilgan, 70 milliard so‘mga baholangan 5,38 gektarlik ob'ekt 2021-2022 yillarda bir necha bor sotuvga qo‘yildi, ammo xaridor topilmadi.

«Sijjak» dam olish maskani O‘zbekiston Kasaba uyushmalari federatsiyasi dam olish zonalari va bolalar sog‘lomlashtirish oromgohlari ro‘yxatiga kiritildi. Bu haqda Vazirlar Mahkamasi tomonidan 2024 yil 27 dekabrda qabul qilingan qarorda belgilab qo‘yilgan.

Ushbu dam olish maskani Toshkent viloyati, Bo‘stonliq tumani, Sijjak mavzesidagi «Sarbog‘» mahallasida joylashgan va marhum prezident Islom Karimovning qizi Gulnora Karimovaga tegishli edi.

Maskan 2017 yilning 10 fevralida Jinoyat ishlari bo‘yicha Toshkent viloyati sudi ajrimi bilan musodara etilgan. Dastlab u O‘zbekiston Triatlon federatsiyasiga vaqtinchalik foydalanishga berildi. So‘ngra auktsion orqali sotuvga qo‘yildi.

5,38 gektar hududni egallagan va 70 milliard so‘mga baholangan ob'ekt 2021-2022 yillarda bir necha bor sotuvga qo‘yildi, ammo xaridor topilmadi.

2023 yil 14 iyundagi prezident farmoniga ko‘ra, «Sijjak» dam olish maskani xususiylashtiriladigan ob'ektlar ro‘yxatidan chiqarilib, 124-maktab-internatning balansida saqlanayotgan edi.

Eltuzga kelib tushgan ma'lumotlarga ko‘ra, Gulnora Karimova egaligida bo‘lgan Sarmishsoy darasidagi mehmonxonalar, katta qurilish obektlari, Qibraydagi dilfinarumi va hatto o‘zining ozodlik davridagi yashab turgan uyi ham turli tashkilotlar hisobiga o‘tkazilib yuborilgan.