Kattaqo‘rg‘onlik fermer talon-torojdan shikoyat qilmoqda, prokuratura esa jim

Kattaqo‘rg‘on tumanidagi fermer xo‘jaligi vakillari o‘z mulki talon-toroj qilingani, ammo huquq-tartibot idoralari bu ishga ko‘z yumayotganidan shikoyat qilmoqda.

Eltuz tahririyatiga murojaat qilgan «G‘aniev Abdimanon Abdurasulovich» fermer xo‘jaligi vakillarining aytishicha, 375 mln so‘mlik texnika vositalari yo‘q qilingan, 450 mln so‘mlik tomchilab sug‘orish tizimi esa buzib tashlangan.

Fermerlar 2024 yil dekabridan beri prokuraturaga murojaat qilib kelayotganini, ammo «jinoyat yashirilayotgani»ni iddao qilmoqda.

Ularga ko‘ra, jinoyat aniq bo‘lishiga qaramay, prokurorlik hujjatlarni orqa sana bilan tuman IIBga yuborib, ishni surinkali tarzda ko‘rib chiqmoqda.

15 yanvar kuni viloyat IIB rahbari sayyor qabulida ham fermerlar ariza topshirgan, ammo ularning aytishicha, ariza jimgina yopilgan.

Fermerlar viloyat prokurori bu ishni shaxsan nazoratga olishi va jinoiy ish ochilishi uchun chora ko‘rishini talab qilmoqda.
Eltuz tahririyati mazkur holat yuzasidan prokuratura va viloyat IIBsiga minbar berishga tayyor.