Xorazmda diniy terrorizmni moliyalashtirishda ayblangan ikki shaxs qamaldi

Jinoyat ishlari bo‘yicha Yangibozor tuman sudida 1993 yilda Xorazm viloyatida tug‘ilgan, oilali, 2 nafar farzandi bor, ma'lumoti o‘rta-maxsus, muqaddam sudlangan M.K. hamda 2000 yilda Jizzax viloyatida tug‘ilgan, ma'lumoti o‘rta-maxsus, muqaddam sudlangan D.L.larga nisbatan O‘zbekiston Respublikasi Jinoyat kodeksining 155-3-moddasi(Terrorizmni moliyalashtirish) 1-qismi va 244-2-moddasi(Diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) 1-qismi bilan jinoyat ishi ko‘rib chiqildi.

Sudda aniqlanishicha M.K. 2023 yilda mavsumiy ishlash uchun mehnat migranti sifatida Rossiya Federatsiyasiga borib, yollanma ish faoliyati bilan shug‘ullanib kelishi davomida “Youtube” videoxostingi orqali turli xil taqiqlangan diniy ekstremistik kanallarga obuna bo‘lib, ushbu kanallardagi videofayllarni tomosha qilib kelgan. “Tavxid va jixod katibasi” xalqaro terrorchilik va ekstremistik tashkilotiga xayrixohlik bildirib, tashkilotning g‘oyalarini qo‘llab quvvatlashni boshlagan hamda terrorizmni moliyalashtirish kabi jinoyatlarni sodir etgan.

D.L. 2019 yil avgust oyidan boshlab mavsumiy ishlash uchun mehnat migranti sifatida Rossiya Federatsiyasining turli hududlarida, shuningdek Qozog‘iston Respublikasi hududida yollanma ish faoliyati bilan shug‘ullanib kelishi davomida “Youtube” videoxostingi, “Tik Tok” messenjerida turli xil taqiqlangan diniy ekstremistik ma'ruzalarini tomosha qilib kelgan. “Tavxid va jixod katibasi” xalqaro terrorchilik va ekstremistik tashkilotiga xayrixohlik bildirib, tashkilotning g‘oyalarini qo‘llab quvvatlashni boshlagan hamda terrorizmni moliyalashtirish kabi jinoyatlarni sodir etgan.

Sud hukmi bilan M.K. hamda D.L.lar JKning 155-3-moddasi 1-qismi va 244-2-moddasi 1-qismida nazarda tutilgan jinoyatlarni sodir etganlikda aybli deb topilib, ularga JKning 59, 61-moddalari tartibida uzil-kesil 10 yil 6 oy ozodlikdan mahrum qilish jazosi tayinlandi.