QO‘QONDA MFY RAISINI SAYLASh JARAYoNINI YoRITMOQChI BO‘LGAN JURNALISTLAR HAYDAB ChIQARILDI

28 may kuni Qo‘qon shahridagi 16-Mahalla fuqarolar yig‘inida raislikka nomzodlarni saylash jarayoni bo‘lib o‘tdi. Jarayonni yoritish maqsadida hududga tashrif buyurgan jurnalistlar saylov hududidan chiqarib yuborilgani haqida Eltuzga xabar yetib keldi.

Jurnalistlarning ma'lum qilishlaricha, ular saylov jarayonini kuzatish, aholiga holis axborot yetkazish va jarayonning oshkoraligini ta'minlash maqsadida maktab hududiga borganlar.

Biroq, ayrim fuqarolar, jumladan, sobiq mahalla raislari Madaminov Nozim va Mo‘ydinov Aziz jurnalistlarning faoliyatiga to‘sqinlik qilganlar. Ular OAV vakillarini maktab hududidan haydab chiqargani ta'kidlanmoqda.

Ma'lumotlarga ko‘ra, mazkur mahallada ro‘yxatdan o‘tgan saylovchilar soni 264 nafarni tashkil etadi. Amaldagi talablarga binoan, saylov bo‘lib o‘tgan hisoblanishi uchun ovoz berishda kamida 60 foiz, ya'ni 157 nafar saylovchi ishtirok etishi shart. Kuzatuvchilarning aytishicha, saylovda atigi 70 nafar fuqaro ishtirok etgan va ularning 10 nafari boshqa mahallalarda istiqomat qiluvchi va nomzodga qarindosh bo‘lgan shaxslar ekani oshkor bo‘lgan.

Hozirda mazkur holat bo‘yicha mahalliy davlat organlari tomonidan rasmiy munosabat bildirilmagan.