XORAZMDA SUDYaLAR QURBON HAYITINI “QAMOQ”DA O‘TKAZIShGA QAROR QILIShDI!

Qonunda yozilganmi? Ha. Prezident farmoni bormi? Albatta. Demak, Qurbon bayrami kuni dam olasizmi? Yo‘q! Agar siz Xorazm viloyati sudlarida ishlasangiz, dam olish – “oddiy xalq” uchun! Sudya uchun esa – sudlanuvchilar bilan bayram!

Xorazm viloyatida viloyat va shahar-tuman sud raislari, jinoyat ishlarini ko‘rayotgan sudyalar Qurbon hayiti munosabati bilan berilgan rasmiy dam olishni, kerak bo‘lsa, Mehnat kodeksi bilan birga arxivga jo‘natishgan ko‘rinadi.

Sudyalar “qonun ustuvor” deyishadi-yu, lekin o‘zlari “qonun ustidan” kulishadi.

Qurbon hayiti kunida sud eshiklari ochiq. Sudyalar “chidab bo‘lmaydi, hibsdagi insonlarimiz kutayapti”, deb, balkim muhabbat, balkim “plan” tuyg‘usi bilan ishga chiqishgan. Qonundagi dam olish haqidagi moddalar esa choynakning yoniga qo‘yib qo‘yilgan.

Bu holatga mahalliy aholi lolu hayron: “Sudya qonunni buzsa, boshqasi kimdan o‘rnak olsin?” deydi ular.