KORRUPTsIYa UChUN IShDAN OLINGAN PROKUROR YaNA VAZIR O‘RINBOSARI ETIB TAYINLANDI

2017–2019 yillarda Adliya vaziri o‘rinbosari, 2021–2024 yillarda esa Buxoro viloyati prokurori bo‘lib ishlagan Mahmud Istamov yana hukumatdagi yuqori lavozimga qaytdi. U endi Adliya vazirining o‘rinbosari etib tayinlandi.

Eslatib o‘tamiz, 2024 yilda Kogon tumani prokurori Bahodir G‘ulomov 90 ming dollar pora bilan qo‘lga tushganidan so‘ng, prezident topshirig‘iga binoan bosh prokuror Nigmatilla Yo‘ldoshev tomonidan Buxoro viloyati prokurori Mahmud Istamov va boshqa mas'ullar lavozimidan ozod etilgan edi.

Mahmud Istamovning nomi bevosita pora ishi bilan bog‘liq yoki unga yaqinligi aniq bo‘lmasada, uning ishdan olinishi mas'uliyatdan chetlashtirish sifatida qabul qilindi.

Ammo oradan bir muddat o‘tib, Mahmud Istamov yana yuqoriroq mansabga tayinlandi. Bu holat jamoatchilikda katta savollar uyg‘otmoqda:

Korruptsiya bilan bog‘liq mojarolar ortidan lavozimidan ketganlar qayta tizimga qaytarilishining o‘zi qanday signal?

Xalq korruptsiyaga qarshi kurashga ishonmoqchi, lekin kecha jazolanganni bugun yangi lavozimda ko‘rish, ko‘plarda haqiqatga bo‘lgan umidni o‘ldirmoqda.