RADIKAL TARG‘IBOT UChUN 56 MILLION SO‘M JARIMA

Urgutlik 29 yashar fuqaro Ikramov Zafar Hakim o‘g‘li radikal mazmundagi diniy materiallarni tarqatgani uchun ikkinchi bor javobgarlikka tortildi.

Ikramov Zafar – 4 bolaning otasi, hech qaerda ishlamaydi. Radikal mazmundagi diniy materiallarni tarqatgani uchun besh «minimalka» jarima bilan jazolangan.

Ogohlantirish va nisbatan yengil jazodan keyin ham Ikramov Zafar keskin targ‘ibotda davom etdi. YouTube’ da tarqatgan videolari asosan Abdulloh Zufar va Ahluddin Navqotiyga tegishli. Diniy ekspertizada bu kontent e'tiqodiy toqatsizlikni targ‘ib qiluvchi, o‘zga dinlarni kamsituvchi, aqidaparastlik deb baholandi.

Samarqand tuman sudi Ikramov Zafar Hakim o‘g‘liga 56 million 250 ming so‘m jarima jazosini tayinladi. Havaskor rijol shu paytgacha eplab 4 bolasini boqmagan bo‘lsa ham, ana endi jarima to‘lash uchun telefonni yig‘ishtirib qo‘yib ishlaydi.