ShUHRAT G‘ANIYeV: «FYeRMYeRLARNING QULOG‘INI KYeS»

17 iyul kuni, soat 13:00 da Prezidentning agrar rivojlanish masalalari bo‘yicha maslahatchisi Shuhrat G‘aniev onlayn majlis o‘tkazdi. 

Majlis mavzusi – Qishloq xo‘jaligi masalalari. «Fermerlar ishlamaydi, texnikalar kun bo‘yi bekor turibdi. Hokimlar, agar tuman 45 tsentner paxta planini bajarmasa, hammang sharmanda bo‘lasanlar» – deydi G‘aniev.

Hokimlar muk tushib konspekt qilish bilan band: ertaga, yo‘q, bugunoq fermerlarni tuzlash kerak!

«Suv dala boshiga tashlab qo‘yilgan. Zovurlarga oqib yotibdi. Suv dala oxirigacha yetib bormayapti. Farg‘ona, Namangan, Qashqadaryo, Andijon – agar hozir sutkasiga 24 soat dalada ishlamasalaring, hammang sharmanda bo‘lib o‘lib ketasanlar..» – xunob bo‘ladi Prezident maslahatchisi Shuhrat G‘aniev. 

Hokim bovalar esa «yozib oldik, bajaramiz» deyishdan nariga o‘tmaydi. 

«Yozib olganingni nima qilaman! Bor, dalaga tush. Fermerlarni terga, qulog‘ini kesib ishlat. E, vijdonsizlar! G‘o‘za parvarishi o‘lgan, dalalar bo‘m-bo‘sh. Ertaga plan to‘lmasa, senlaram o‘lasan. Hozir dalaga chiqib fermerni ishlat. Ovozingni chiqarmaydigan qilib bari bilan bittalab gaplashib ol. Qaytaraman, bir oydan keyin baring o‘lasan, shunchaki, o‘lib ketasanlar» – G‘anievning bu ko‘rsatmalari ham muqovasi gerbli bloknotga yozib olindi. 

Bu safar noqulay ob-havo degan bahona ham o‘tmaskan. Ishqilib paxta plan to‘lsin. Yo‘qsa, qimmatli hokim bovalarimizdan yoppasiga ayrilib qolamiz.