FITODIABETIC – QAND KASALINING MUTLAQ DAVOSI EMAS

O‘zbek mediyasida yangi «mo‘jizaviy» dori reklamasi urchidi. Milliy drama teatri aktyorlaridan tortib, bit tanimas blogerlar ham zo‘r berib Fitodiabetik taqdim etgan Diabet damlamasini reklama qilmoqda. 

Bu damlama 2 million 200 ming so‘m turadi. Eltuz Fitodiabetik firmasi bilan bog‘lanib noqulay savollarni qalashtirdi. Olgan javoblarimiz qisqa mazmuni esa quyidagicha:

1. Damlamaning shifoli ta'siri hech qanday klinik tekshiruvlar bilan tasdiqlanmagan;

2. Fitodiabetik firmasining yuridik manzili noaniq;

3. Firma savdo aylanmasi oshkora emas. Zahardek qimmat dori savdosidan davlatga qancha soliq kelib tushishi noma'lum;

4. Damlama reklamalarida Balzak yoshidan oshgan artis xotin-xalaj, Payg‘ambar yoshiga yetgan hojakalar qatnashmoqda. Xo‘sh, bu kampaniya uchun kim katta mablag‘ tikkan? 

Mediani saralash ko‘nikmasiga ega bo‘lmagan lo‘xlar esa qarz, kredit havola qilib diabet damlamani sotib olayotir. Sog‘liqni saqlash vazirligi bu borada biror bayonot bermadi. Balki katta reklama kampaniyasi uyushtirgan «tadbirkor» va vazirlik orasida manfaatlar to‘qnashuvi bordir? 

Eltuz diabet bemorlarga eslatib o‘tishga mas'ul  hech qaysi fito damlama qand kasalini yo‘q qilib yubormaydi. Faqat kompleks va muntazam davo kurslari olib, qat'iy dietaga amal qilish shart.