Xazorasplik fermerlarning sabr kosasi to‘ldi

Xorazm viloyati Xazorasp tumani fermerlari ayni paxta terim mavsumida lo‘kkillab hokimlik majlislariga qatnab yuribdi.

Har bir fermerga hokim yordamchisi yoki davlat byudjetidan ta'minlanadigan idora boshliqlari vakil (qorovul) qilib tayinlangan. Bir ishchiga o‘nta boshliq nimaga kerak?

Shuningdek, fermerlar oxirgi yillardagi yagona daromad manbai bo‘lgan sholini davlatga shartnomasiz noqonuniy topshirishga majburlanmoqda. Bu har yili takrorlanuvchi «yulg‘uch an'ana». Bu jarayonda ham hokim yordamchilari bosh-qosh.

«Minbarlarda bizga aytilgan gaplarning bari quruq safsata. Amalda fermerlar noqonuniy ishlar qilishga majburlanyapti. Fermerni hech kim himoya qilmaydi. Masalan, o‘tgan yili bir tumandan ikkinchi tumanga qonuniy olib borilayotgan paxta to‘xtatilib, fermerni IIBga olib borishgan, tushuntirish xati yozdirishgan va qilmagan ishlarini bo‘yniga qo‘yishga urinishgan. Xatto traktorchi va fermerni 15 sutkaga qamoqqa olishmoqchi bo‘lishgan. Atayin bosim qilishadi. Maqsad – bizni yo‘qotib, yerlarni kattaroq klasterga topshirish,» – deydi qonunsizlikdan bezgan fermerlar.

Bunday mantiqsiz qarorlar va kuchli bosim butun Respublika fermerlarini ezib yubordi. Fermerni azoblash mexanizmining muhandisi kim?