Andijonda terimchilar paxta pulini ololmayapti

Andijonda terimchi ayollar bir oydan buyon paxta pulini ololmayapti. Klasterning fermerlardan milliardlab qarzi borligi aytilmoqda.

«Daryo» nashrining ma'lum qilishicha, Marhamat tumanida yashovchi bir guruh terimchi ayollar paxta pulini ololmayotgani yuzasidan nashrga murojaat qilgan.

Ayollarning aytishicha, oktyabr oyi boshidan beri tergan paxtalari uchun pul berilmagan. Fermer xo‘jaligi rahbariga bir necha marta qilingan shikoyatlar befoyda ketgan. U «Qaerga murojaat qilsangizlar ham qiliveringlar, menga klaster pul bermayapti», deb javob qaytargan.

Holat yuzasidan Marhamat tumani hokimligi axborot xizmatining «Daryo»ga ma'lum qilishicha, pulni undirish bo‘yicha viloyat prokuraturasi ish olib bormoqda.

«Marhamat tekstil» MChJ klasterining 53 ta fermer xo‘jaligidan 1 milliard 600 million so‘m qarzidan hozirda 490 million so‘mi undirilib berildi. Qolgan qarzdorlikni undirish bo‘yicha viloyat hamda tuman prokuraturasi tomonidan ishlar olib borilayotgani ma'lum qilinadi, — deyiladi hokimlik izohida.

Kambag‘allikni qisqartirish va bandlik vazirligi matbuot kotibi Gulnoza Alimovaning «Daryo»ga bergan ma'lumotiga ko‘ra, holat Mehnat inspektsiyasiga yuborilgan va natijalari yuzasidan qo‘shimcha axborot beriladi.

Ma'lumotlarga ko‘ra, klaster o‘tgan mavsumda ham terim pullarini to‘lamagan.

Tuman hokimligining ma'lum qilishicha, «Marhamat tekstil» MChJ klasterining 2024 yilda paxta hosilini topshirgan Ulug‘nor tumanidagi «Ollomurod yerlari» fermer xo‘jaligidan 135 million so‘m qarzi mavjud. Hozirgi paytda ushbu klaster tomonidan to‘lanmayotgan pullar yuzasidan huquqni muhofaza qiluvchi organlar tomonidan o‘rganish ishlari olib borilayotgani aytiladi.

Manba: https://t.me/UzFoHR