Buxoroda ham IIB xodim va uning oilasi is gazidan o‘ldi

Buxoro shahrida ham bir fojiali holat ro‘y berdi. Hamza ko‘chasidagi 17-ko‘p qavatli uyda yashagan IIB xodimi, uning ayoli va ikki farzandi is gazidan zaharlanib vafot etdi. Hodisa 23 noyabr kuni, dam olish payti kechga yaqin ma'lum bo‘lgan.

Manbalarning aytishicha, topilgan paytda oilaning barcha a'zolari allaqachon o‘lgan bo‘lgan. Hodisa sodir bo‘lgan joy o‘sha zahoti yopib qo‘yilgan. Ko‘chaga tumonat odam yig‘ilgan. Viloyat rahbariyati va mas'ul idoralar ham joyiga kelgani aytilmoqda.

Tasdiqlanmagan ma'lumotlarga ko‘ra, is gazining tarqalishi qurilma nosozligi yoki xavfsizlik qoidalari buzilishi bilan bog‘liq bo‘lishi mumkin. Rasmiy izoh hali berilmadi.

Bu holat joriy haftada ichki ishlar xodimlari bilan ro‘y bergan ikkinchi fojiadir. Ikki kun avval Andijonda Ichki Ishlar organi xodimi Oybek Yoqubov va uning farzandlari xizmat uyida is gazidan zaharlanib halok bo‘lgani xabar qilingan edi. 7 yoshli qizaloq o‘sha kuni vafot etgan. Uch yoshli go‘dak esa jonlantirish bo‘limida og‘ir ahvolda ekani aytilgan.

Ikki viloyatda bir hafta ichida sodir bo‘lgan bu fojialar is gazi bilan bog‘liq xavfsizlik qoidalariga yana bir bor jiddiy e'tibor qaratish zarurligini ko‘rsatmoqda.