Shahrixonlik o‘qituvchi ko‘zi ojizligi uchun kamsitilgani haqida gapirdi

3 dekabr – xalqaro nogironlar kuni. Andijon viloyati Shahrixon tumani Naynavo qishlog‘ida yashovchi, tug‘ma ko‘zi ojiz Zokirjon Toshpo‘latov 3 dekabr munosabati bilan Eltuzga murojaat qilib, ish joyida uchrayotgan muammolari haqida ma'lum qildi.

Uning aytishicha, uch yil oldin Andijon Davlat universiteti filologiya fakultetini tamomlab, 41-umumta'lim maktabiga ishga kirgan. Unga “tarjimon-kotiba” biriktirilgani sababli o‘quv jarayoni muvaffaqiyatli amalga oshib kelgan. Jamoaga ham tez moslashgan.

Biroq joriy yil avgust oyida dars soatlari taqsimoti vaqtida nizo chiqqani va ayrim o‘qituvchilarning bosimi boshlangan. Toshpo‘latovning ta'kidlashicha, oliy toifadagi o‘qituvchi Rahnamo Sottiboeva 30 soat talab qilgan, direktor esa uning tarafini olgan. Natijada u uzoq tortishuvlardan so‘ng 20 soat bilan qolgan va asosan og‘ir sinflardan dars berishga majbur bo‘lgan.

Toshpo‘latov portalga murojaat yo‘llaganidan keyin rahbariyat va ayrim o‘qituvchilar munosabati yanada yomonlashganini aytadi. Unga nisbatan ayblovlar, bosimlar va hatto haqoratlar bo‘lgan. Xususan, bir o‘qituvchi uning nogironligini yuziga solgan.

RayONO xodimlari esa “ko‘r deyishi haqorat emas” degan javobni bildirgani Toshpo‘latovni ranjitgan.

“Mening ko‘zim ojiz, ammo aqlim emas. Men faqat teng munosabat, hurmat va adolat talab qilaman”, deydi u.

U murojaatining maqsadi nogironligi bor fuqarolarga nisbatan stereotip va kamsitishlarni yo‘qotish, ish joylarida adolat tamoyillarini kuchaytirish ekanini qo‘shimcha qildi.