Ganalik «payg‘ambar» va'da qilgan oxirzamon sodir bo‘lmadi

Yirtiq bo‘z xaltadan qilingan butafora choponni egniga tashlab, qo‘liga yog‘och hassa ushlab tarmoqda va'zlar qilayotgan Afrikalik din tujjori 25 dekabr kuni qiyomat qo‘pishini bashorat qilgan va insoniyatni qutqarish uchun katta yog‘och kema yasashga kirishganini bildirgan edi.

Qadimda o‘tgan Nuh payg‘ambaridan farqli afrikalik Ebo bu ishga bank hisobi uchun qulay pul o‘tkazish va donat tizimlarini o‘rnatib olganidan keyin yeng shimarib ishga kirishdi. O‘zining fanerdan yasalgan butafora kemalariga odam olish limitini cheklamadi. Qiyomatga yaqin qurib bitkazilishi kerak bo‘lgan kemalar sonini sakkiztaga oshirdi. Lekin u Xudo oldida va'da qilgan oxirzamon 25 dekabr kuni sodir bo‘lmadi.   

«Xudo bu safar fikridan qaytdi va kemalarni qurib bitkazishimiz uchun qo‘shimcha vaqt berdi», — deya e'lon qildi u.

Ilgari uning minglab izdoshlari o‘z mol-mulklarini sotib yuborishgan, chiptalar xarid qilishgan va «2025 yil 25 dekabr kuni Yerni g‘arq qiladigan kuchli jalalardan keyingi» uch yillik suzishga tayyorgarlik ko‘rib, kemalar qurilish maydonchasi oldida navbatga tizilishgan edi.

Izdoshlarning bir qismi haligacha Xudo «fikridan qaytganiga» ishonishda davom etmoqda. Boshqalar esa qilgan xayriyalari kemaga emas, balki puch yong‘oqqa sarflanganini tushuna boshlashgan.