“Ilhom” Fondi jiddiy moliyaviy inqiroz bilan yuzlashdi

O‘zbekistonda ijodkorlarni qo‘llab-quvvatlash uchun tashkil etilgan “Ilhom” jamoat fondi tizimida jiddiy ijtimoiy muammo yuzaga kelgan. Fond tasarrufidagi ijodiy uyushmalarda ishlaydigan taxminan 250 nafarga yaqin xodim bir yildan ortiq vaqt davomida maosh olmagan.

Rasmiy ma'lumotlarga ko‘ra, ushbu uyushmalar markaziy apparati va hududiy bo‘limlari xodimlarining ish haqi, unga tenglashtirilgan to‘lovlar, saqlash xarajatlari hamda faoliyatni ta'minlash uchun mablag‘ bir yildan buyon to‘lanmayotir. Bu mablag‘ 13,5 milliardga yetgan.

Natijada maosh to‘lash masalasi to‘liq korxona va uyushma rahbariyati zimmasiga qolgan. Davlat qarorlari va hisob-kitoblar mavjud bo‘lsa-da, ularni amalga oshirish uchun zarur moliyaviy resurs ta'minlanmagan. Rahbariyat esa imkoniyat cheklangan sharoitda ish haqini qoplashga urinib kelmoqda.

Bir yildan ortiq vaqt davomida maosh olmagan xodimlar qarzga botmoqda, ijtimoiy jihatdan himoyasiz qolmoqda. Bu esa ijodiy sohada kadrlar oqimi, ish unumdorligining pasayishi va tizimning zaiflashishiga olib kelishi mumkin.

Eng keskin savol shunda: agar davlat tomonidan mablag‘ ajratilmasa, nega ushbu tizimdan to‘liq faoliyat, tadbirlar va natija talab qilinmoqda? Nima uchun ijodiy uyushmalar xodimlari yillab sabr qilishga majbur?

Mutaxassislar bu holatni oddiy moliyaviy qiyinchilik emas, balki qaror qabul qilish bilan uni moliyalashtirish o‘rtasidagi jiddiy uzilish sifatida baholamoqda. 

Agar masala zudlik bilan hal etilmasa, “ijodkorlarni qo‘llab-quvvatlash” shiori amalda mazmunsiz iboraga aylanib qolishi mumkin.

Ijodiy sohani qo‘llab-quvvatlash bayonot bilan emas, o‘z vaqtida to‘lanadigan maosh bilan boshlanadi. Bir yildan ortiq maosh olmagan 250 nafar xodim bu tizimdagi haqiqiy holatni ochiq ko‘rsatib turibdi.