Yondirilgan ko‘priklar

Yevropada yashay boshlaganim qochqinlikning o‘ninchi yili yakunlanarkan, bugun ilk bor yarim asrlik umrim ortiga qaramoqchi bo‘ldim. Jo‘n ma'noda esa Internetga kalit so‘zlarini tashlab, eski eshiklarni bir-bir ochmoqchi bo‘ldim.

Garchi qochayotgan odam odatda o‘zi qurgan ko‘priklarni buzishga harakat qiladi yoki uni quvg‘inga olayotganlar qiladi bu ishni. Internetni titkilarkanman, yondirilgan ko‘priklar – qilingan, qilinmagan, oxiriga yetmagan loyihalar, tashkilotlar, sahifalar, saytlarning xarobalaridan aks sado kabi qaytayotgan so‘zlarga, jumlalarga duch keldim.

Ko‘priklar odatda odamlarni biror manzilga yetkazish uchun yoki biror to‘siqni, jarlik, daryoni kesib o‘tish uchun quriladi. Ommaviy axborot vositalari, internet saytlari, bugungi kunda sotsial tarmoqlardagi sahifalar ham shu ma'noda bamisoli ko‘prik kabi.

Biroq ortga boqarkanman, nimaiki sayt qilgan bo‘lsam, yaroqsiz holda ko‘rdim. Uzbekinfo, Isyonkor, Tegirmon, Ponauz, Jadidlar, Uznews… Ularni yaxshi bir niyat bilan, boshqalarga erkin fikr imkoniyatini yaratish uchun ko‘prik bo‘lsin, deya qilmaganmidik?

Ehtimol, ularning Intenet bag‘rida xarob va tashlandiq yotishida ham qonuniyat bordir. Bu qonuniyatlar endi alohida boshqa mavzu… va oldga boqish, yurishda davom etish kerak.

Yaxshilik qilu suvga tashla, deyishadi. Shu ma'noda siz ham mening ayni blogimni kimningdir saytida, sotsial tarmoqda, guruhda ko‘rib qolsangizu buni o‘zingiz uchun foydali deb bilsangiz biror layk, belgi, izoh qoldiring, ularsiz eski ko‘priklar kabi muhtasham saytlar nurar, sahifalar eskirib sarg‘ayarkan, so‘zlarimiz ham keraksiz tosh kabi yo‘qlik qa'riga cho‘kadi.

Qudrat Bobojon,
eltuz.com, 2015 yil 28 sentyabr