Bir guruh o‘zbeklar prezidentdan Muhammad Solihni yurtga qaytarishni so‘rashdi

23 yanvar kuni bir guruh o‘zbekistonliklar muxolifat lideri Muhammad Solihni “vatanga qaytarish”ni so‘rab prezidentga murojaat xati yozishdi.

“Endi biz qo‘rqmaymiz. Siyosiy yo‘ldan boramiz!” dedi «Eltuz» nashriga intervyu bergan tashabbus ishtirokchilaridan biri shoir Mahmud Rajab.

26 shaxs, jumladan, Mahmud Rajab, Ilhom Aliev va Aminboy Qodirov tashabbusi bilan yozilgan murojaatga feysbuk tarmog‘ida imzo to‘plash davom etmoqda.

«Haq-huquqlari poymol qilinib, chet ellarda quvg‘inda yurgan vatandoshlarimizni, xususan, muxolifat lideri, shoir Muhammad Solih nomini oqlab, Vatanga qaytarish vaqti allaqachon yetdi, deb o‘ylaymiz», deyiladi murojaatda.

Dastlab prezident Shavkat Mirziyoevdan muxolifat lideri Muhammad Solihni vatanga qaytarishni so‘rash tashabbusini 30 dekabr kuni toshkentlik huquq faoli Sur'at Ikromov ko‘tarib chiqqan edi.

Bunday chaqiriq sababini u “har qanday davlatda muxolifat bo‘lishi kerakligi” bilan izohlagan edi.

Kuzatishlariga asoslanib, huquq faoli o‘z bayonotida Muhammad Solih mamlakatga qaytishi kerakligini bildirgan edi.

Muhammad Solihni vatanga qaytarish tashabbusi ishtirokchilari 90-yillar oxirida so‘ndirilgan siyosiy faoliyatning tiklanishi uchun bu dastlabki qadam bo‘lishini bildirishmoqda.

Eltuz.com