«AQLLI VAZIR» BUYRUG‘I OQIBATI 

2024 yil oxirida Kambag‘allikni qisqartirish va bandlik vaziri Botir Zohidovning huquqiy asosdan xoli buyrug‘i natijasida davlat byudjetiga 2 milliard so‘mdan ortiq zarar yetkazildi. Birgina qaror oqibatida o‘nlab fuqarolar ishsiz qoldi, mehnat huquqlari toptaldi va sud qarorlari bilan bu holat “tugatish emas, kamuflyaj o‘zgartirish” sifatida baholandi.

Oliy Majlis Senati tomonidan vazir Zohidov nomiga yuborilgan parlament so‘rovida mehnat qonunchiligini buzish holatlari, ularning davlat va fuqarolar manfaatiga yetkazgan zarari alohida ta'kidlangan. So‘rovda huquqbuzarliklar aniq faktlar bilan keltirilgan — ayniqsa, sud qarorlariga ko‘ra mehnat shartnomalarining asossiz ravishda bekor qilingani va buning oqibatida yuzaga kelgan moddiy va huquqiy talafotlar tilga olingan.

Tashqi mehnat migratsiyasi agentligi vazirlik buyrug‘iga ko‘ra tugatilgan deb e'lon qilingan, ammo amalda u boshqa bo‘ysunuvda faoliyatini davom ettirmoqda. Jamoatchilik, ijtimoiy tarmoqlar va hatto vazirlik mutasaddilari bu vaziyatni “ishchi xuquqlarini buzish” deb baholashdi. Sud esa buni ochiq-oydin haqsizlik deb topdi — shu paytgacha 30 ga yaqin fuqaro sud orqali ishga tiklandi.

Ishga tiklangan fuqarolarga to‘lanishi lozim bo‘lgan mablag‘lar hanuzcha to‘lanmagan. Shu sababli Majburiy ijro byurosi tomonidan Migratsiya agentligining barcha hisob raqamlariga band solingan. Ya'ni, noto‘g‘ri qabul qilingan bir qaror natijasida agentlik moliyaviy bo‘g‘inda qoldi.

Parlament so‘rovida ko‘rsatilishicha, prokuratura organlari 2024 yilning o‘zida 1,1 milliard so‘mlik zararni aybdor mansabdorlardan regress tartibida undirish to‘g‘risida qarorlar chiqargan. Agar bu amaliyot davom ettirilsa, Zohidovning “tugatish” operatsiyasi ortidan kelib chiqqan zararlar ham mansabdorlar zimmasiga yuklanishi mumkin.

Kambag‘allikni qisqartirish vazifasi yuklatilgan vazir tomonidan aynan ish o‘rinlarini yo‘q qilishga xizmat qiluvchi qaror qabul qilinishi bugungi boshqaruv tizimidagi muammolarni ochiq-oydin namoyon etmoqda. Davlat manfaatiga zarar yetkazish, fuqarolar huquqini poymol etish va sud qarorlariga qarshi harakat qilish — bu holatlar javobgarliksiz qolmasligi kerak.