Hindistonda Sresan Pharmaceutical Manufacturer farmatsevtika kompaniyasi egasi hibsga olindi

Hindistonda Sresan Pharmaceutical Manufacturer farmatsevtika kompaniyasining egasi hibsga olindi.

U ishlab chiqargan yo‘tal siropini iste'mol qilgandan so‘ng kamida 19 nafar bola halok bo‘lgan.

Laboratoriya sinovlari Coldrif nomli preparat tarkibida dietilenglikol — texnik suyuqliklarda qo‘llaniladigan zaharli modda mavjudligini ko‘rsatdi. Uning kontsentratsiyasi ruxsat etilgan me'yordan qariyb 500 marta yuqori bo‘lgan.

Sirop mamlakatning bir nechta hududida taqiqlandi va politsiya jinoiy tergovni boshladi.

2023 yildan beri Hindistonda yo‘tal siroplarining eksporti Gambiya, O‘zbekiston va Kamerunda bolalarning zaharlanishi bilan bog‘liq xalqaro fojialar turkumidan so‘ng davlat sinovlarining qo‘shimcha bosqichidan o‘tkazilmoqda.

2022 yil oxirida O‘zbekistonda Hindistonning Marion Biotech kompaniyasiga tegishli «Dok-1 Maks» siropini qabul qilgandan so‘ng 60 dan ortiq bola vafot etgan. Yana yigirmaga yaqin bola nogiron bo‘lib qolgan.

Keyinchalik ma'lum bo‘lishicha, bu preparat tarkibida ham dietilenglikol mavjud bo‘lgan.

Jahon sog‘liqni saqlash tashkiloti (JSST) Hindistondagi yangi o‘lim holatlari «dori vositalarini nazorat qilishdagi jiddiy muvaffaqiyatsizlikni» ko‘rsatayotganini ta'kidladi. Agentlik, shuningdek, zaharli preparatlar tashqi bozorga chiqishi mumkinligidan ogohlantirdi.

Hindiston dunyodagi eng yirik dori ishlab chiqaruvchilardan biri bo‘lib qolmoqda.