Sudlangan bosh vrach Chortoqda shifokorlarni talashda davom etmoqda

Eltuz tahririyatiga Chortoq tumani sog‘liqni saqlash bo‘limi xodimlaridan murojaat kelib tushdi. Murojaatda tuman tibbiyot birlashmasi bosh shifokori jamoaning mukofot pullarini o‘marayotgani ta'kilanadi.

Xodimlar iddaosiga ko‘ra, bosh vrach sudlanganiga qaramay lavozimini saqlab qolgan va faoliyatini davom ettirmoqda. Bosh shifokor katta-kichik davralarda o‘zini Chortoq tuman DXX xodimi Jasurbek va Namangan viloyati prokuraturasi vakili Abdulbosit Nurmatovga yaqin ekanini ta'kidlaydi.

«Bosh shifokor bizlarni mukofot puli vedomostlariga qo‘l qo‘yishga majburlaydi. Kim qo‘l qo‘ymasa ishdan bo‘shataman, DXX orqali qamataman deb po‘pisa qiladi» deydi tibbiyot birlashmasi xodimlari.

Birlashma xodimlari 2025 yil iyul, avgust va sentyabr oylari uchun yozilgan rag‘batlantirish to‘lovlarini haligacha ololmaëtganini, bu mablag‘lar noqonuniy tarzda ushlab qolingani haqida iddao qilmoqda.

Namangan viloyati sog‘liqni saqlash boshqarmasi rahbari Abdilxodi Iminov  esa ushbu holatga ko‘z yumib kelmoqda. Boshqarma rahbari va bosh shifokor orasida qanday oldi-berdi munosabati borligi mavhum.

Masala yuzasidan DXX, prokuratura, Namangan viloyat sog‘liqni saqlash boshqarmasidan amaliy choralar ko‘rish so‘raladi.