Mahmud Namozov O‘zbekistonda ishsizlik muammosi yo‘q deb o‘ylaydi

«Oila va jamiyat» gazetasini (29.03) varaqlar ekansiz, undagi maqolalarda bugungi o‘zbek jamiyatining ancha og‘riqli muammolari tilga olinganiga guvoh bo‘lasiz.

To‘g‘ri, gap bu muammolarning ildizi, sabablari haqida emas. Ular shunchaki, yo‘l-yo‘lakay tilga olinib o‘tilgan. Shunga qaramay, agar sal mulohaza qilinsa, gazeta shu paytgacha aytishga jur'at eta olmayotgan jihatlarni ilg‘ab olishingiz mumkin.

Mahmud Namozov bugungi o‘zbek qo‘shiqchiligida manmanlikka berilmagan, yulduzlik kasaliga chalinmagan, o‘z obro‘sini saqlashga harakat qilib kelayotgan kam sonli xonandalardan biridir.

Ammo gazeta muxbiri bilan suhbatda xonanda jamiyatimizdagi ayrim masalalar haqida o‘z fikrlarini bildirganki, ular o‘quvchida istehzo paydo qiladi.

Xususan, u ko‘plab yurtdoshlarimizning xorijga ish izlab ketayotgani haqidagi mulohazalarida bu holatni ishsizlik deb atamasligini aytar ekan, muammoni: «Bilmadim, buni qanoatsizlik, deyish kerakmi yoki olisdagi quyruqqa havasmi», deya izohlaydi.

Mana shu gaplarni o‘qir ekansiz, bir vaqtlar Islom Karimovning o‘z yurtida ish topa olmay, Rossiyada mardikorlik qilib yurgan vatandoshlarimizni dangasalar, deb atagani yodga tushadi.

Shu bilan birga, xonanda tadbirkorlar ishchi izlab yurganini bildirib, yurtdoshlarimiz bunga ko‘nmay, besh-o‘n so‘m ko‘p pul oladigan xorijni ma'qul ko‘rayotganini ta'kidlaydi.

«Lekin bola-chaqasidan uzoqda yashashiga, g‘ururini poymol qilishiga arzirmikan shu?» deya ritorik savol tashlaydi xonanda.

Maqolada ishlagani ertasiga yetmaydigan, bir oylik mehnati haqiga bir hafta kun o‘tkazishi ham mushkul bo‘lgan, mehnati qadr topmagani uchun xorijda mardikorlik qilayotgan vatandoshlarimiz himoyasiga bir so‘z aytilmagani alam qiladi.

Shuningdek, gazetada shoira Umida Abduazimovaning ijtimoiy tarmoqlarda bolalar nega gazeta o‘qimayotgani mavzusini ko‘tarib chiqqani haqida yozilgan.

Shoira maktabda o‘tgan kitobxonlik kechasida to‘plagan olti yuz boladan birortasi Aziz Nesin, Mark Tven, Jek Londonni bilmaganidan yozg‘iradi.

U maktablarda bolalar besh yuz so‘mdan yig‘ib, bir sinf bittadan obuna bo‘layotganiga e'tibor qaratar ekan: «O‘qituvchilarni «qayta o‘qishlari» uchun majburan, ming bir tazyiqlar bilan ikki yuz, uch yuz ming so‘m sarflatib, partiya va muallimlar nashrlariga obuna qildirishadi. Tushunolmayman, bolalarni o‘qitib imtihon qilamizmi yoki ziyoli atalmish o‘qituvchilarnimi?» deya savol tashlagan shoira.

Bahodir Sharif
O‘zbekistonlik gazetxon tahallusi
Eltuz.com