Muhammadning boshiga kavush bilan urgan o‘qituvchi jazolandi

Kollej o‘quvchisini urgan urganchlik o‘qituvchi Zebo Nafasova 14 aprel kuni ishdan bo‘shatildi.

Uning ishdan ketishiga oyoq kiyimi bilan o‘quvchini urayotgani aks etgan videoning ijtimoiy tarmoqda tarqalgani sabab bo‘ldi.

Videoda Urganchdagi avtoyo‘l kolleji biologiya o‘qituvchisi 17 yashar Muhammad Jumanazarovni qo‘lidagi ayollar tuflisi bilan qarsillatib urayotgani aks etgan.

«Nega dars qoldirding? Men seni shu bugun yo‘q qilaman»,- deya o‘qituvchi qo‘lidagi oëq kiyimi bilan bolaning yuziga, yelkasiga bir necha bor soladi.

Video yuzasidan ijtimoiy tarmoqdagi bahslarda bola tarbiyasi bo‘yicha o‘zbek jamiyatining ikkiga bo‘linganini kuzatish mumkin.

«Kaltak yeb turmay, bu o‘qituvchining urib jag‘ini sindirish kerak… Bu tarbiyalamayapti, yigitni qo‘rqoq qilib qo‘yyapti… Agar o‘zining bolasini kimdir ursa, itga o‘xshab akillab borardi…», deya izoh qoldirdi feysbukda Ilhomjon Abdumo‘minov.

Ayni paytda o‘qituvchi tarafini olayotganlar ham kam emas.

«O‘g‘il bolani tarbiyalash juda qiyin, ayniqsa quloqsiz bo‘lsa! Hech narsa qilmaydi urgan bo‘lsa! O‘g‘il bola, qilgan aybiga yarasha ursa, buning yomon joyi yo‘q! Hadeb o‘qituvchini ayblash noto‘g‘ri, vaqti kelsa o‘zimizni qonimizga tashna qilib yuboradi bu o‘g‘il bola zoti!))», deya yozadi 3 o‘g‘li borligini pisanda qilib Dilya ismli ayol.

O‘zbekiston ta'lim tizimida o‘qituvchilarning maktab o‘quvchilarini, talabalarni urishi yangilik emas.

Masalan, 2017 yilning 16 martida farg‘onalik boshlang‘ich sinf o‘qituvchisining bolalarni o‘quv quroli bilan urayotgani aks etgan video tarqalgan, voqeadan ko‘p o‘tmay o‘sha o‘qituvchi ham ishdan ketgan edi.

Rassom Tuz
Eltuz.com