Jirinovskiy markaziy osiyoliklardan xavotirda

Markaziy Osiyo davlatlariga past nazar bilan qarashini yashirmaydigan Rossiya liberal demokratik partiyasi lideri Vladimir Jirinovskiy o‘zining telegram kanali orqali dunyoga koronavirus keng tarqalayotgan sharoitda Xitoydan emas, ko‘proq Markaziy Osiyo davlatlaridan qo‘rqish kerakligi bildirdi.

Rus siyosatchisining aytishicha, Markaziy Osiyo xalqlari muntazam ravishda Xitoyga va Rossiyaga qatnaydi. Shu bois, ular uchun Rossiya chegaralarini yopish, bu o‘lkalardan migratsiyani to‘xtatish kerak.

“Chunki Xitoyda tartib-qoida bor, mazkur mamlakatga kirganlar ham, chiqqanlar ham qattiq tekshiriladi. Markaziy Osiyo davlatlarida esa tibbiyot ham, nazorat ham yaxshi emas”, deydi Jirinovskiy.

Vladimir Putinning minbarorti mikrofoni deya e'tirof etiladigan Jirinovskiy koronavirus tarqalgan bir paytda Markaziy Osiyo mamlakatlari bilan aloqa ӯrnatishda davom etish yaxshi ish emasligini ta'kidlaydi. Bemorlar go‘yoki Rossiyada bo‘lib turgani uchun omon qolishi mumkinligini, biroq Rossiya iqtisodiyotiga zarar keltirishini urg‘ulaydi.

Bir-ikki yil muqaddam o‘zbek amaldorlari tomonidan Buxoro shahrida yetti bukilib kutib olingan Vladimir Jirinovskiy bundan 3 oy oldin markaziy osiyolik migrantlar Rossiyada tibbiyot sohasida shifokor lavozimida ishlayotganidan xavotirda ekanini ham aytgan edi.

Ӯzbek amaldorlari bizga past nazar bilan qarab kelayotgan, bizni faqat qora ishchi sifatida ko‘rishni afzal bilguvchi Jirinovskiy kabilarning xatti-harakatlarini inobatga olgan holda, Rossiya tomonidan bosimlar ostida ilgari surilayotgan YeOIIga a'zolikka oid takliflarni uzil-kesil rad etsa ham yomon bo‘lmaydi.

Eltuz.com muxbiri