Qanday qilib mashinalik bo‘lish mumkin…

Eltuzga maktub yo‘llagan jizzaxlik talaba 10-15-fevral kunlari Pedagogika va Politexnika institutlarida yakuniga yetayotgan imtihonlar jarayoni haqidagi kuzatuvlarini shunday bayon etadi. “Qaysi bir talaba bilan suhbatlashmang, o‘qishdan va fanlarni yaxshi o‘zlashtirishdan umidi so‘ngani, ushbu oliygohlarda bilim olib bo‘lmasligini aytadi. Nega unda bu oliy o‘quv yurtlarida tahsil olishayotgani va maqsadi haqida so‘raganimizda, ular faqat bakalavr diplomi va kelajakda shu diplom orqali biror ishli bo‘lish niyatida ekanliklarini ta'kidlashadi”.

Talabaning so‘zlariga ko‘ra, diplomi yo‘qlar Rossiya yoki boshqa chet davlatlarda mardikorlikka mahkum bo‘lib qolishdan cho‘chishmoqda. O‘qib bilim olishga umidning so‘nayotganligiga esa institutlarda avj olgan poraxo‘rlik sabab.

“Faqat 20 foiz o‘qituvchilar bilimga qarab baho qo‘yishi mumkin, lekin bu umumiy vaziyatni o‘zgartirmaydi. Qolgan o‘qituvchilar ma'lum miqdor pora evaziga talaba istagan bahoni qo‘yib berishadi.”

Uning aytishicha, bu yilgi bitta fandan o‘tish bahosi 30-50 ming so‘m. Demak 10 ta fandan imtihon topshiradigan talaba o‘rtacha 500 ming so‘m sarf qiladi. “Agar talaba kontrakt asosida tahsil olsa, uning ahvolini tasavvur qilib ko‘ring! Bir yillik kontrakt puli 5 900 000 so‘mdan boshlanadi. Shuningdek, imtihonlardan keyin o‘qituvchilar yangi mashinali, uyli bo‘lib qolishadi”, deya yakunlaydi maktubini jizzaxlik talaba.

Eslatib o‘tamiz, 2015 yili yillik korruptsiya darajasi reytingi bo‘yicha O‘zbekiston 167 davlat ichida 153 o‘rinni olgan, bu sobiq Sovet ittifoqi davlatlari orasida eng past ko‘rsatkichdir. Korruptsiya deyarli yo‘q bo‘lgan eng «toza» davlatlar: Daniya, Finlyandiya, Щvetsiya, Gollandiya va Norvegiyadir. Ayni mamlakatlarda so‘z erkinligi, siyosiy va fuqaroviy huquqlarni hurmat qidish darajasi ham ancha yuqoridir.

Eltuz.com