Pensionerlar haqini talab qilgani uchun…

Navoiylik nogiron va ikki farzandini yolg‘iz tarbiyalayotgan Boymurodova Dildora pensionerlar haqini talab qilib norozilik aktsiyasida qatnashgani uchun jazoga tortildi.

Uning bildirishicha, tuman pensionerlari sentyabr-oktyabr nafaqalarini ololmaganligi sabab, katta trassa yo‘lini to‘sib qo‘yib, norozilik bildirishgan.

Maktubida u, 90 yoshli savodsiz bir keksa ayol Samieva M.ning ishonchli vakili sifatida qatnashgani, voqeaga aralashmay chetda turgani, shuningdek, ko‘cha aktsiyasi ishtirokchilariga hech bir jazo qo‘llanilmaganini bildiradi.

Biroq kuchishlatar tizimi xodimlari birgina uni “jazoga tortishgan” – unga 7 million 104 ming so‘m jarima solishgan.

Uch yildan buyon ishsiz qolayotgani bois, farzandlari 12 yillik majburiy ta'lim olish huquqidan ham mahrum qolayotgan ayolga nisbatan bu bedodlik “O‘lganning ustiga tepgan bo‘ldi!” deya yozadi Dildora o‘zining hukumat raxbarlariga yozgan xatida.

Jabrdiydaning bildirishicha, uning o‘nlab idoralarga yozgan shikoyatlari hamon javobsiz qolmoqda.

Endilikda esa sud qarori bilan har oyda nogironlik nafaqasining yarmi – 226 ming so‘m jarimani qoplash uchun urib qolinadi.

“Nahot inson qadr-qimmati shu qadar yerga urilgan bo‘lsa mamlakatimizda?”, deya nola qiladi ayol prezidentga murojaatida.

Eltuz.com