Bo‘z saylovchilari Ketmonovga o‘z muammolarini aytmadi

«O‘zbekiston ovozi» gazetasi Xalq demokratik partiyasi yetakchisi, partiyaning parlament quyi palatasidagi fraktsiyasi rahbari Hotamjon Ketmonovning Bo‘z tumanidagi saylovchilar bilan uchrashuvidan reportaj e'lon qildi.

Avvaldan aytib qo‘yaylik, maqolada biror joyda «deputat saylovchilarning muammolari bilan qiziqdi», degan so‘zni uchratmaysiz. Hatto «muammo» degan so‘zning o‘zi yo‘q. Buning o‘rniga deputat Ketmonov bechora saylovchilarni «mamlakatimiz ijtimoiy-iqtisodiy hayotidagi yangiliklar, tarixiy bunyodkorliklar haqidagi fikr-mulohazalari» bilan boqqan.
Bundan xulosa shuki, yoki saylovchining muammosi yo‘q, yoki saylovchilar Ketmonovga o‘z muammolarini aytgani bilan biror ish chiqmasligini biladi. Muammosiz tuman, shahar yoki qishloq bo‘lmasligini inobatga olsak, keyingi fikrimiz to‘g‘riroqqa o‘xshaydi.

H.Ketmonov uchrashuvda qonunchilikka oid gaplarni ham gapirib, yaqinda XDP «Hayvonot dunyosini muhofaza qilish va undan foydalanish to‘g‘risida»gi qonun loyihasi bo‘yicha Demokratik kuchlar bloki (parlamentimizda shunaqasi ham bor) ilgari surgan ayrim fikrlarga qo‘shila olmasligini bayon qilgani bilan maqtangan.
Mana shu e'tirozlardan biriga qisqagina to‘xtalamiz. XDP qonun loyihasida ijtimoiy himoya masalasiga e'tibor qaratilmagan, deb hisoblab, «Tabiatni muhofaza qilish davlat qo‘mitasi mansabdor shaxslarining murakkab va noqulay iqlim sharoitlarida mehnat qilishini inobatga olib, ularni ijtimoiy muhofaza qilish masalalarini mustahkamlab qo‘yish zarur», degan taklif kiritgan.

Eh, Ketmonov, shu yerda ham mansabdorlarni o‘ylabdi. Undan ko‘ra, hayvonot dunyosini mansabdorlardan himoya qilishni o‘ylamaysanmi, nomard! Qo‘riqlanadigan joyda ham ov qiladigan o‘shalar, noyob hayvonlarni hech qanday javobgarliksiz otadigan ham o‘shalar-ku!

Xullas, maqolada deputatning saylovchilar bilan uchrashuvi har tomonlama foydali bo‘lgani ta'kidlanadi.

«Saylovchilar yangi qonunlar haqida ko‘p ma'lumotlar oldi. Deputatimiz saylovchilar takliflarini eshitdi. Demak, bunday uchrashuvlardan hammamiz manfaatdormiz», deya xulosa qilinadi reportajda.

Eltuz.com