Istanbul hokimi: Terrorchi O‘zbekiston vatandoshidir

Istanbul hokimi Vosip Shohin va Istanbul amniyat mudiri Mustafo Cholishqon 17 yanvar kuni matbuot anjumani o‘tkazib, qo‘lga olingan odamning O‘zbekiston vatandoshi Abduqodir Masharipov ekanligini aytishdi.

Qo‘lga olish paytida bitta ham o‘q otilmagan. Masharipovning uyidan 197 ming AQSh dollari chiqqan.

IShIDga mansubligi aytilayotgan mazkur shaxsning laqabi Abu Muhammad Xurosoniy bo‘lgan.

Anjumanda ta'kidlanishicha, 33 yashar O‘zbekiston vatandoshi va etnik tojik Abduqodir Masharipov O‘zbekistonda ham qidiruvga berilgan.

Uning Afg‘oniston va Pokistondagi lagerlarda ta'lim olgani ham ta'kidlandi.

Aniqlanishicha, Masharipov Turkiya hududiga Eron orqali noqonuniy yo‘llar bilan o‘tgan.

Shu kunlarda kelib chiqishi Markaziy Osiëdan bo‘lgan 50 kishi ayni voqeaga aloqadorlikda ayblanib qo‘lga olindi.

Abduqodir Masharipov bilan birga qo‘lga olinganlar orasida bir iroqlik erkak, shuningdek Misr, Senegal va Somali vatandoshlari bo‘lgan ayollar borligi aytilmoqda.

Eltuz.com manbalarining aytishicha, Masharipov O‘zbekistonning Namangan viloyatidan bo‘lib, ikki farzandning otasidir.

Eltuz.com